પાલનપુર-અમદાવાદ હાઇવે પર વિદેશી દારૂ ઝડપાયો; બે આરોપીઓની અટકાયત

બનાસકાંઠા એલસીબી પોલીસે પાલનપુર તાલુકામાં મોટી કાર્યવાહી કરી છે. પોલીસે જગાણા ગામની સીમમાં પાલનપુર-અમદાવાદ હાઈવે પરથી વિદેશી દારૂનો જથ્થો ઝડપી પાડ્યો છે. પોલીસે મહિન્દ્રા પિકઅપ ડાલા નંબર GJ18AZ8511માંથી ભારતીય બનાવટના વિદેશી દારૂની 1344 બોટલ અને બીયર ટીન જપ્ત કર્યા છે. દારૂની કિંમત 8.31 લાખ રૂપિયા છે. કુલ મુદ્દામાલની કિંમત 13.46 લાખ રૂપિયા છે. પોલીસે બે આરોપીઓની ધરપકડ કરી છે. આરોપીઓમાં ડીસાના ભોપાનગર માળીવાસના જોગાભાઈ કાળાજી માળી અને અશોકભાઈ અણદાજી માળીનો સમાવેશ થાય છે. તપાસમાં સામે આવ્યું છે કે આ દારૂનો જથ્થો રમેશભાઈ નવાજી માળી (રહે. માલગઢ, તા.ડીસા)ના કહેવાથી મંડારથી રેવદર રોડ પરની સુંધેશા હોટલ પાસેથી લાવવામાં આવ્યો હતો. આરોપીઓ આ દારૂનો જથ્થો અમદાવાદના કાલુપુર ફ્રૂટ માર્કેટ ખાતે પહોંચાડવાના હતા. પોલીસે આ મામલે પાલનપુર તાલુકા પોલીસ સ્ટેશનમાં ગુનો નોંધી વધુ તપાસ હાથ ધરી છે.