મહેસાણાના ગાંધીનગર લિંક રોડ પર ગત રાત્રે (૨૧ મે) એક મોટી દુર્ઘટના ઘટતા સહેજમાં અટકી ગઈ હતી. લાખવડ ગામ તરફ જતા માર્ગ પર આવેલી ખારી નદી નજીકથી પસાર થતી સાબરમતી ગેસ કંપનીની અંડરગ્રાઉન્ડ પાઇપલાઇનમાં અચાનક ટેકનિકલ ખામી કે અન્ય કારણોસર ગેસ લીકેજ થયો હતો. ગેસ હવામાં પ્રસરતા જ ત્યાં અચાનક ભયાનક આગ ફાટી નીકળી હતી. મોડી રાત્રે આશરે ૧:૧૪ કલાકે લાગેલી આ આગની જ્વાળાઓ દૂર-દૂર સુધી દેખાવા લાગી હતી, જેને પગલે આસપાસના રહીશોમાં ભારે ગભરાટ અને અફરાતફરીનો માહોલ સર્જાયો હતો.
જ્યારે મોડી રાત્રે આખો વિસ્તાર ગાઢ નિંદ્રામાં હતો, ત્યારે આ ભીષણ આગ પર સ્થાનિક રહીશ વિપુલભાઈની નજર પડી હતી. તેમણે સહેજ પણ ગભરાયા વિના ભારે અગમચેતી અને સમયસૂચકતા દાખવી હતી. વિપુલભાઈએ તાત્કાલિક ધોરણે મહેસાણા મહાનગરપાલિકાના ફાયર કંટ્રોલ રૂમને આ ઘટનાની જાણ કરી ચોક્કસ લોકેશન આપ્યું હતું. તેમની આ જાગૃતતા આગામી મોટી હોનારતને રોકવામાં સૌથી મહત્વનું પગલું સાબિત થઈ હતી.
ગેસ પાઇપલાઇનમાં આગ લાગી હોવાના સમાચાર મળતા જ મહેસાણા મનપાની ફાયર બ્રિગેડની ટીમ હરકતમાં આવી ગઈ હતી. ઘટનાની સંવેદનશીલતા અને ગંભીરતાને ધ્યાને લઈને ફાયર ફાઇટરોની ટીમ વાહનો સાથે ગણતરીની મિનિટોમાં જ ઘટનાસ્થળે દોડી ગઈ હતી. કટોકટીની સ્થિતિને પહોંચી વળવા માટે સાબરમતી ગેસ કંપનીના અધિકારીઓનો પણ સંપર્ક કરી ગેસનો પુરવઠો પાછળથી બંધ કરાવવામાં આવ્યો હતો.
ફાયર બ્રિગેડના જવાનોએ ગેસ લાઇનના પ્રેશર અને આગની તીવ્રતા વચ્ચે ભારે જહેમત આદરી હતી. આધુનિક સાધનો અને પાણીના સતત મારો ચલાવીને આખરે ગેસ પાઇપલાઇનની આ વિકરાળ આગ પર સંપૂર્ણ કાબૂ મેળવી લેવાયો હતો. સદનસીબે આ દુર્ઘટનામાં કોઈ જાનહાનિ કે મોટી સંપત્તિને નુકસાન થયું નથી. ફાયર વિભાગ અને સ્થાનિક યુવકની ત્વરિત કામગીરીને કારણે એક બહુ મોટી ઔદ્યોગિક કે રહેણાંક વિસ્તારની હોનારત ટળી ગઈ હતી, જેથી સ્થાનિક લોકોએ રાહતનો શ્વાસ લીધો હતો.
