પરીક્ષા; હિંમતનગરમાં નીટની પરીક્ષા 92 બ્લોકમાં યોજાશે

હિંમતનગરમાં નીટની પરીક્ષા માટે પાંચ કેન્દ્રો પર વ્યાપક વ્યવસ્થા કરવામાં આવી છે. આ પરીક્ષામાં કુલ 2208 વિદ્યાર્થી ભાગ લેશે. પરીક્ષા બપોરે 2થી સાંજે 5 વાગ્યા સુધી યોજાશે. પરીક્ષા કેન્દ્રોમાં ટાવર ચોક પાસેની હિંમત હાઈસ્કૂલ, મહેતાપુરા પાસેની કેન્દ્રીય વિદ્યાલય, મહાવીરનગરથી કાંકરોલ રોડ પર આવેલ જૈનાચાર્ય વિદ્યાલય, હિંમતનગરની પોલીટેકનિક કોલેજ અને મેડિકલ કોલેજનો સમાવેશ થાય છે. આ પાંચેય કેન્દ્ર પર કુલ 92 બ્લોકમાં પરીક્ષા યોજાશે. વિદ્યાર્થીઓને સવારે 11 વાગ્યાથી કેન્દ્રોમાં પ્રવેશ આપવાનું શરૂ કરાયું છે. સુરક્ષા વ્યવસ્થા માટે હિંમતનગર એ અને બી ડિવિઝન પોલીસ સ્ટેશનના પોલીસ ઇન્સ્પેક્ટર, પાંચ PSI અને 76 પોલીસ કર્મીઓને તૈનાત કરવામાં આવ્યા છે.