ઉદયપુર ખાતે આયોજિત વેદાંતા ઝિંક સિટી હાફ મેરેથોનમાં ડોકરા રનિંગ ક્લબનો દબદબો જોવા મળ્યો હતો. દેશભરમાંથી વિવિધ રનિંગ ક્લબના સભ્યો સાથે યોજાયેલી આ મેરેથોનમાં ડોકરા રનિંગ ક્લબના 300થી વધુ રનર્સે ઉત્સાહપૂર્વક ભાગ લીધો હતો.
મેરેથોનમાં 5 કિમી, 10 કિમી અને 21 કિમીની કેટેગરીમાં ડોકરા રનર્સે ભાગ લીધો હતો. તમામ રનર્સે નિર્ધારિત સમયમર્યાદામાં દોડ પૂર્ણ કરી મેડલ મેળવી ક્લબનું ગૌરવ વધાર્યું હતું. મેરેથોનમાં ડોકરા રનિંગ ક્લબના ત્રણ રનર્સે પોતાની એજ કેટેગરીમાં પ્રથમ સ્થાન મેળવી પોડિયમ ફર્સ્ટ હાંસલ કર્યું હતું. ગીતાબેન પટેલ 10 કિલોમીટર વુમન્સ પ્રથમ સ્થાન અશોકભાઈ વ્યાસ મેન્સ એજ કેટેગરીમાં પ્રથમ સ્થાન અને કૌશિકભાઈ પટેલ, અમદાવાદ એજ કેટેગરીમાં પ્રથમ સ્થાન પ્રાપ્ત કર્યું છે આ ઉપરાંત ડીસાના શશીકાંતભાઈ શાહે 10 કિમી દોડમાં પોતાની એજ કેટેગરીમાં તૃતીય ક્રમ હાંસલ કરી ડોકરા રનિંગ ક્લબનું ગૌરવ વધાર્યું હતું.
આ અંગે ડોકરા રનિંગ ક્લબના ફાઉન્ડર કર્ણ બ્રહ્મભટ્ટે જણાવ્યું હતું કે, “ડોકરા રનિંગ ક્લબના સભ્યો માટે આ મેરેથોન ખૂબ જ ખાસ રહી હતી. સૌથી આનંદની વાત એ છે કે પ્રેક્ટિસ દરમિયાન જે રનર્સનો સમય વધુ હતો, તેમના મેરેથોનના સમયમાં 15થી 20 મિનિટ સુધીનો નોંધપાત્ર સુધારો જોવા મળ્યો છે. આ સફળતા રનર્સની સતત મહેનત, નિયમિત પ્રેક્ટિસ અને ટીમવર્કનું પરિણામ છે.” ઉદયપુર મેરેથોનમાં ડોકરા રનિંગ ક્લબના 300થી વધુ રનર્સની એકસાથે હાજરીએ સમગ્ર ડોકરા પરિવારની એકતા, ઉત્સાહ અને રનિંગ પ્રત્યેના જુસ્સાનું અનોખું દ્રશ્ય ઊભું કર્યું હતું.
