ધાનેરા પોલીસે 3.65 લાખનો વિદેશી દારૂ સાથે એક આરોપીને ઝડપ્યો

ધાનેરા પોલીસે ગેરકાયદેસર રીતે દારૂની હેરાફેરી કરતા એક આરોપીને ઝડપી પાડી, રૂ. ૩.૬૫ લાખનો વિદેશી દારૂ અને અન્ય મુદ્દામાલ જપ્ત કર્યો છે. પ્રાપ્ત માહિતી અનુસાર, ધાનેરા પોલીસ મથકની ટીમ ગત રાત્રે પેટ્રોલિંગમાં હતી. આ દરમિયાન, નાનુડા બસ સ્ટેશન પાસે એક સફેદ રંગની ઈકો કાર શંકાસ્પદ જણાતા પોલીસે તેને રોકવાનો પ્રયાસ કર્યો. પોલીસને જોતા જ કારચાલક ગાડી મૂકીને ભાગી ગયો, પરંતુ પોલીસે પીછો કરીને તેને ઝડપી પાડ્યો. પોલીસે કારની તલાશી લેતા અંદરથી કાળા કપડાથી ઢાંકેલા બોક્સ મળી આવ્યા. તપાસ કરતા, તેમાંથી રૂ. ૩,૬૫,૩૦૩ ની કિંમતની વિદેશી દારૂ અને બિયરની કુલ ૧૪૮૮ બોટલો મળી આવી. આ ઉપરાંત, રૂ. ૩ લાખની ઈકો કાર અને રૂ. ૫,૦૦૦ ની કિંમતનો એક મોબાઈલ ફોન પણ જપ્ત કરવામાં આવ્યો હતો. પોલીસે કુલ રૂ. ૬,૭૦,૩૦૩ નો મુદ્દામાલ કબજે કર્યો છે.