ગુજરાત સરકારે હાઈકોર્ટમાં સ્વીકારી ગંભીર ખામીઓ; બે SDM અને એક મામલતદાર સામે ખાતાકીય તપાસ શરૂ
બનાસકાંઠા જિલ્લાના ડીસા ખાતે ફટાકડા ફેક્ટરીમાં થયેલા ભયાનક બ્લાસ્ટના મામલે હવે સરકારી તંત્ર અને જવાબદાર અધિકારીઓ સામે કાયદાનો સિકંજો કસાયો છે. આ સમગ્ર દૂર્ઘટના અને તેના લાઈસન્સિંગની પ્રક્રિયામાં ગંભીર બેદરકારી અને ખામીઓ રહી હોવાનો ગુજરાત સરકારે ગુજરાત હાઇકોર્ટ સમક્ષ સત્તાવાર સ્વીકાર કર્યો છે. સરકારના આ સ્વીકાર બાદ તંત્રમાં ભારે ફફડાટ વ્યાપી ગયો છે.
તપાસ દરમિયાન અત્યંત ચોંકાવનારો ખુલાસો થયો છે કે, જે ફટાકડાના એકમોમાં પૂરતી ફાયર સેફ્ટી (આગ સામે સુરક્ષા)ની કોઈ સુવિધા જ નહોતી, તેવા એકમોને પણ તંત્ર દ્વારા આંખ આડા કાન કરીને લાઈસન્સ ઈસ્યુ કરી દેવામાં આવ્યા હતા. નિયમોને નેવે મૂકીને આપવામાં આવેલા આ લાઈસન્સના કારણે જ આ મોટી હોનારત સર્જાઈ હોવાનું પ્રાથમિક દ્રષ્ટિએ સામે આવ્યું છે.હાઈકોર્ટમાં મામલો પહોંચતા અને સરકારની આકરી ઝાટકણી બાદ આખરે જવાબદાર અધિકારીઓ સામે પગલાં લેવાની ફરજ પડી છે. આ સમગ્ર કૌભાંડ અને બેદરકારી બદલબે સબ ડિવિઝનલ મેજીસ્ટ્રેટ (SDM) અને એક મામલતદારસામે તાત્કાલિક ધોરણે ખાતાકીય તપાસ (Departmental Inquiry) હાથ ધરવામાં આવી છે.
સૂત્રોના જણાવ્યા અનુસાર આગામી દિવસોમાં આ તપાસનો વ્યાપ વધશે અને લાઈસન્સ પ્રક્રિયા સાથે સંકળાયેલા અન્ય નાના-મોટા કર્મચારીઓ સામે પણ કડક શિક્ષાત્મક પગલાં લેવાઈ શકે છે. હાઈકોર્ટના કડક વલણને પગલે હવે સમગ્ર બનાસકાંઠા જિલ્લાના ફટાકડાના એકમોના લાઈસન્સની રી-વેરિફિકેશન પ્રક્રિયા પણ તેજ કરી દેવામાં આવી છે.
