ડીસા શહેરમાં જૂની અદાવતને લઈને એક ૨૦ વર્ષીય યુવક પર ચાર શખ્સોએ ભેગા મળી લોખંડની પાઇપ અને ધોકા વડે જીવલેણ હુમલો કરતા ચકચાર મચી જવા પામી છે. હુમલામાં ગંભીર રીતે ઘવાયેલા યુવકને સારવાર અર્થે હોસ્પિટલમાં ખસેડવામાં આવ્યો છે, જ્યાં તેની ફરિયાદના આધારે ડીસા દક્ષિણ પોલીસે કાયદેસરની કાર્યવાહી શરૂ કરી છે.
મળતી માહિતી મુજબ, ડીસાના રેલ્વે સ્ટેશન વિસ્તારમાં રહેતો અને ડીએનપી કોલેજમાં અભ્યાસ કરતો ધવલકુમાર ચીકુજી ઠાકોર (ઉં.વ. ૨૦) ગત તા. ૩૦/૦૩/૨૦૨૬ ના રોજ રાત્રિના સમયે એક્ટિવા લઈને ઘરે જઈ રહ્યો હતો. આ દરમિયાન નરેન્દ્ર રમેશભાઈ પાસવાન નામના શખ્સે તેને ગાળો આપી હતી. ધવલે ગાળો આપવાનું કારણ પૂછતા મામલો બિચક્યો હતો.
ફરિયાદ મુજબ, નરેન્દ્ર પાસવાને છત પરથી પથ્થર મારી ધવલને ઇજા પહોંચાડી હતી. ત્યારબાદ નરેન્દ્રના પિતા રમેશભાઈ પાસવાન, માતા શર્મીલીબેન અને ભાઈ વિનોદભાઈ પાસવાન પણ ત્યાં આવી પહોંચ્યા હતા. શર્મીલીબેને ધવલને પકડી રાખ્યો હતો, જ્યારે પિતા અને બંને પુત્રોએ લોખંડની પાઇપ તથા ધોકા વડે ધવલના મોઢા અને કપાળના ભાગે આડેધડ ઘા ઝીંક્યા હતા.
આ હુમલામાં ધવલના દાંત તૂટી ગયા હતા અને માથાના ભાગે ગંભીર ઇજાઓ થતા તેને ટાંકા આવ્યા હતા. હુમલાખોરોથી બચવા ભાગતી વખતે યુવક દીવાલ પરથી પડી જતા બેભાન થઈ ગયો હતો. તેને તાત્કાલિક ડીસા સિવિલ હોસ્પિટલ અને ત્યારબાદ વધુ સારવાર માટે ખાનગી હોસ્પિટલમાં ખસેડવામાં આવ્યો હતો.ડીસા દક્ષિણ પોલીસે ધવલ ઠાકોરની ફરિયાદના આધારે ચારેય આરોપીઓ વિરુદ્ધ ગુનો નોંધી આગળની તપાસ હાથ ધરી છે. પ્રાથમિક તપાસમાં અગાઉ થયેલ મનદુઃખના કારણે આ હુમલો થયો હોવાનું બહાર આવ્યું છે.
