મહેસાણા શહેરમાં સાયબર ઠગાઈના બનાવો દિનપ્રતિદિન વધી રહ્યા છે, જેમાં હવે સાક્ષર અને વયોવૃદ્ધ લોકો પણ સરળતાથી ફસાઈ રહ્યા છે. તાજેતરમાં મહેસાણાના એક નિવૃત્ત આરોગ્ય કર્મચારી સાયબર ક્રાઈમનો ભોગ બન્યા છે. આરોપીઓએ તેમને શેરબજારમાં રોકાણ કરવા પર ટૂંકા સમયમાં મોટું અને આકર્ષક વળતર (હાઈ રિટર્ન) મેળવવાની લાલચ આપી હતી.
આ પ્રલોભનમાં આવીને નિવૃત્ત કર્મચારીએ અલગ-અલગ બેંક ખાતાઓમાં કુલ રૂ. ૧૨.૬૦ લાખની મસમોટી રકમ ઓનલાઈન ટ્રાન્સફર કરી દીધી હતી. જોકે, લાંબા સમય સુધી રોકાણ સામે કોઈ જ નફો કે મૂળ રકમ પાછી ન મળતા અને ઠગ ટોળકીનો સંપર્ક ન થઈ શકતા તેમને પોતાની સાથે છેતરપિંડી થયાનો અહેસાસ થયો હતો.
આ મામલે પીડિત દ્વારા સાયબર ક્રાઈમ પોલીસ સ્ટેશનમાં અજાણ્યા શખ્સો વિરુદ્ધ ફરિયાદ નોંધાવવામાં આવી છે. પોલીસે ગુનો નોંધીને બેંક ખાતાઓની વિગતો અને આઈપી (IP) એડ્રેસના આધારે ઠગોને પકડી પાડવા માટે સઘન તપાસના ચક્રો ગતિમાન કર્યા છે.
