બનાસકાંઠા જિલ્લામાં ચેન સ્નેચિંગ થકી તરખાટ મચાવનાર ચીખલીગર ગેંગના એક આરોપી ને એલસીબી પોલીસે ઝડપી પાડ્યો છે. પોલીસે એક આરોપી ને દબોચી લઈ ચેન સ્નેચિંગના 24 ગુનાઓનો ભેદ ઉકેલી વધુ તપાસ હાથ ધરી છે.
બનાસકાંઠા પોલીસને હ્યુમન સોર્સ અને ટેકનિકલ સર્વેલન્સના આધારે આરોપીનું પગેરું મેળવવામાં સફળતા મળી હતી. ઝડપાયેલા આરોપીનું નામ રાજાસિંહ નરસિંગ બાધા હોવાનું સામે આવ્યું છે. જ્યારે તેનો ભાઈ અને સાથી રામજાને સિંહ નરસિંગ બાધા હજી ફરાર છે. બંને ભાઈ છેલ્લા દસ વર્ષથી વાહન ચોરી કરીને વિવિધ શહેરોમાં ચેન સ્નેચિંગના ગુનાઓને અંજામ આપતા હતા. પોલીસ તપાસમાં, આરોપીઓ મહેસાણા, રાધનપુર, જુનાગઢ, ચોટીલા, ભુજ, મોરબી, બોટાદ, ગાંધીધામ, વડનગર, આદિપુર, અંજાર અને ડીસા સહિતના વિસ્તારોમાં 24થી વધુ ચેન સ્નેચિંગના ગુનાઓમાં સંડોવાયેલા છે. બે વર્ષ અગાઉ પાલનપુરમાં એક મહિલાના ગળામાંથી સોનાની ચેન લૂંટવાનો ગુનો પણ આ જ ગેંગે કર્યો હોવાનું બહાર આવ્યું છે. હાલમાં એલસીબી દ્વારા આરોપીની પૂછપરછ ચાલી રહી છે અને વધુ ગુનાઓ ઉકેલાય તેવી શક્યતા વ્યક્ત કરવામાં આવી રહી છે. ત્યારે પોલીસે ફરાર આરોપીને ઝડપી લેવાના ચક્રો ગતિમાન કર્યા છે.
