ડીસાના ધારાસભ્ય અને ગુજરાત રાજ્યના વન અને પર્યાવરણ મંત્રી પ્રવિણભાઈ માળીના જન્મદિવસ નિમિત્તે ડીસા શહેર ભાજપ યુવા મોરચા દ્વારા એક ભવ્ય મેગા બ્લડ ડોનેશન કેમ્પનું આયોજન કરવામાં આવ્યું હતું. બુધવારે ડીસાના જલારામ હોલ ખાતે યોજાયેલા આ સેવાકીય કાર્યક્રમમાં યુવાનો અને નગરજનોએ ઉત્સાહભેર ભાગ લીધો હતો.જેમાં જિલ્લા યુવા મોરચાના પ્રમુખ સાગરભાઈ ચૌધરી, ડીસા શહેર ભાજપ પ્રમુખ સાગરભાઈ નાઈ, યુવા મોરચાના મંત્રી રામભાઈ ઠાકોર તેમજ અન્ય હોદ્દેદારો અને કાર્યકરોના ભગીરથ પ્રયાસોથી આ કેમ્પનું સફળ આયોજન કરાયું હતું. મંત્રીના જન્મદિવસને સેવાદિન તરીકે ઉજવતા અંદાજિત ૨૪૧ જેટલા રક્તદાતાઓએ ઉત્સાહપૂર્વક રક્તદાન કરી માનવતા મહેકાવી હતી. અને કાર્યક્રમને ભવ્ય સફળતા અપાવી હતી.
આ પ્રસંગે ખુદ મંત્રી પ્રવિણભાઈ માળીએ કેમ્પમાં ખાસ ઉપસ્થિત રહીને તમામ રક્તદાતાઓ અને કાર્યકરોનો આભાર વ્યક્ત કર્યો હતો. તેમણે યુવા મોરચાની આ ઉમદા કામગીરીને બિરદાવી હતી. કેમ્પ દરમિયાન બ્લડ બેંકના ડોક્ટરોની ટીમ દ્વારા રક્ત એકત્રિત કરવામાં આવ્યું હતું. આ સેવા યજ્ઞમાં ભાજપના તમામ મોરચાના પદાધિકારીઓ, વરિષ્ઠ આગેવાનો અને મોટી સંખ્યામાં કાર્યકરો ઉપસ્થિત રહ્યા હતા.
