પુત્રની દવા કરાવવા આવેલા સેલ્સમેનનું બાઇક ગણતરીની મિનિટોમાં ગાયબ, પોલીસ તપાસ શરૂ
ડીસામાં જાહેર સ્થળોએથી વાહન ચોરીના બનાવોમાં સતત વધારો થઈ રહ્યો છે, ત્યારે વધુ એક કિસ્સો ડીસા સિવિલ હોસ્પિટલના પાર્કિંગમાં પ્રકાશમાં આવ્યો છે. અહીં પુત્રની સારવાર માટે આવેલા એક વ્યક્તિનું મોટર સાયકલ અજાણ્યા તસ્કરો ઉઠાવી ગયા હોવાની ફરિયાદ પોલીસ મથકે નોંધાઈ છે.
ડીસાના રાજપુર રોડ પર ગવાડી વિસ્તારમાં રહેતા અને સેલ્સમેન તરીકે કામ કરતા સાજીદહુશેન હારુનભાઈ મેમણ ગત તા. 24/04/2026 ના રોજ સાંજના સમયે પોતાના પુત્રની દવા કરાવવા માટે ડીસા સિવિલ હોસ્પિટલ ખાતે આવ્યા હતા. તેઓએ પોતાનું હીરો કંપનીનું બ્લેક સિલ્વર કલરનું સ્પ્લેન્ડર મોટરસાયકલ (નંબર: GJ-08-BC-7657) હોસ્પિટલના પાર્કિંગમાં સુરક્ષિત રીતે પાર્ક કર્યું હતું.સાજીદહુશેન જ્યારે પુત્રની સારવાર કરાવીને થોડી જ વારમાં પાર્કિંગમાં પરત ફર્યા, ત્યારે ત્યાં રાખેલું મોટર સાયકલ ગાયબ જણાયું હતું. આસપાસના વિસ્તારમાં અને પાર્કિંગમાં ઘણી શોધખોળ કરવા છતાં બાઇક મળી આવ્યું ન હતું. આખરે અંદાજે રૂ. 35,000 ની કિંમતના મોટર સાયકલની ચોરી અંગે ભોગ બનનારે ઓનલાઇન ઈ-એફઆઈઆર નોંધાવી હતી.
આ બાબતે ડીસા શહેર ઉત્તર પોલીસ મથકમાં ગુનો દાખલ થતા પોલીસે અજાણ્યા ચોર ઇસમ વિરુદ્ધ ધોરણસરની તપાસ હાથ ધરી હોસ્પિટલના સીસીટીવી ફૂટેજના આધારે તસ્કરોનું પગેરું મેળવવાના ચક્રો ગતિમાન કર્યા છે.
