દૈયપ-કુંભારડી રોડ પર ગુરુવારની રાત્રે એક ચાલુ ઇકો ગાડીમાં અચાનક આગ ફાટી નીકળવાની ઘટના સામે આવી છે. શોર્ટ સર્કિટના કારણે લાગેલી આ આગમાં જોતજોતામાં આખી ગાડી ભડભડાટ સળગી ઉઠી હતી. સદનસીબે ચાલકે સમયસૂચકતા વાપરી ગાડીમાંથી નીચે ઉતરી જતાં મોટી જાનહાનિ ટળી હતી. પ્રાપ્ત વિગતો અનુસાર દૈયપ ગામના વતની ભરતભાઈ તગાભાઈ વેણ પોતાની ઇકો ગાડી લઈને ખેતરેથી પરત ગામ તરફ જઈ રહ્યા હતા.
આ દરમિયાન દૈયપ-કુંભારડી રોડ પર ગાડીમાં અચાનક શોર્ટ સર્કિટ થયું હતું. જોતજોતામાં એન્જિનના ભાગેથી આગની જ્વાળાઓ નીકળવા માંડી હતી. ગાડીમાં આગ લાગતા જ ડ્રાઈવર તુરંત સતર્ક થઈ ગયા હતા. ગાડીમાંથી નીચે ઉતરી ગયા હતા. જેના કારણે તેમનો આબાદ બચાવ થયો હતો. આગ એટલી વિકરાળ હતી કે, જોત જોતામાં આખી ગાડી આગની લપેટમાં આવી ગઈ હતી. આગને કારણે ઇકો ગાડી સંપૂર્ણપણે બળીને ભસ્મીભૂત થઈ ગઈ હતી. પ્રાથમિક અહેવાલો મુજબ આ દુર્ઘટનામાં કોઈ પણ પ્રકારની જાનહાનિ નોંધાઈ નથી.
