બનાસકાંઠા જિલ્લામાં દારૂ અને ડ્રગ્સની ગેરકાયદેસર પ્રવૃત્તિઓ વિરુદ્ધ અવાજ ઉઠાવનાર ધારાસભ્ય જીગ્નેશ મેવાણીના સમર્થનમાં આજે ડીસા શહેરમાં એક રેલીનું આયોજન કરવામાં આવ્યું હતું. રેલીમાં મોટી સંખ્યામાં રાજકીય પક્ષોના નેતાઓ, કાર્યકર્તાઓ અને વિવિધ સામાજિક સંગઠનોના આગેવાનો જોડાયા હતા, જેમણે મેવાણીના મુદ્દાને પોતાનું સમર્થન જાહેર કર્યું હતું.
ધારાસભ્ય જીગ્નેશ મેવાણીના સમર્થનમાં યોજાયેલી આ રેલીમાં રાજકીય એકતાના દ્રશ્યો જોવા મળ્યા હતા. આમ આદમી પાર્ટી (આપ) ના સ્થાનિક નેતાઓ અને કોંગ્રેસ પક્ષના કાર્યકર્તાઓ મોટી સંખ્યામાં આ રેલીમાં જોડાયા હતા. આ ઉપરાંત, અનેક સામાજિક આગેવાનો અને યુવાનોએ પણ મેવાણીના અવાજને બુલંદ બનાવવા માટે રેલીમાં ભાગ લીધો હતો. આ એકતાએ સ્પષ્ટ સંકેત આપ્યો કે દારૂ અને ડ્રગ્સના મુદ્દે સમગ્ર વિપક્ષ અને સામાજિક સંગઠનો એક મંચ પર છે. શહેરના મુખ્ય માર્ગો પરથી પસાર થયેલ આ રેલીમાં સમર્થકોએ સરકાર વિરોધી સૂત્રોચ્ચાર કર્યા હતા અને ગુજરાતમાં દારૂબંધી હોવા છતાં બેફામ વેચાતા દારૂ તથા યુવા પેઢીને બરબાદ કરી રહેલા ડ્રગ્સના દૂષણને તાત્કાલિક રોકવાની માંગ કરી હતી.
બાદમાં આ રેલી ડીસા શહેરની પ્રાંત કચેરી ખાતે પહોંચી હતી. જ્યાં રેલીનું નેતૃત્વ કરી રહેલા આગેવાનોએ નાયબ કલેક્ટર (પ્રાંત અધિકારી) ને વિગતવાર આવેદનપત્ર સુપરત કર્યું હતું.જેમાં મુખ્યત્વે જીગ્નેશ મેવાણી દ્વારા ઉઠાવવામાં આવેલા મુદ્દાઓને સમર્થન આપીને, બનાસકાંઠા જિલ્લા સહિત સમગ્ર ગુજરાતમાં દારૂ અને ડ્રગ્સના ગેરકાયદેસર વેચાણ પર કડક કાર્યવાહી કરવાની માંગ કરવામાં આવી હતી. આવેદનપત્રમાં સ્થાનિક સ્તરે પોલીસ તંત્ર દ્વારા કરવામાં આવતી ઢીલી કાર્યવાહી સામે પણ સવાલો ઉઠાવવામાં આવ્યા હતા અને ત્વરિત પગલાં ભરવા માટે વિનંતી કરવામાં આવી હતી.આ ઘટના પરથી સ્પષ્ટ છે કે બનાસકાંઠા જિલ્લામાં જીગ્નેશ મેવાણીનો આ મુદ્દો હવે એક જન આંદોલનનું સ્વરૂપ ધારણ કરી રહ્યો છે.
