ડીસા તાલુકાના ચંદાજી ગોળીયા ગામની સીમમાં જુગાર રમતા ૨૦ જુગારીયા ઝડપાયા

એલસીબી પોલીસનો સપાટો,૩.૮૩ લાખનો મુદ્દામાલ જપ્ત; બનાસકાંઠા લોકલ ક્રાઈમ બ્રાન્ચ પોલીસે ડીસા તાલુકાના ચંદાજી ગોળિયા ગામની સીમમાં ચાલતા એક મોટા જુગારધામ પર દરોડો પાડી ૨૦ આરોપીઓને રંગેહાથ ઝડપી પાડ્યા છે. પોલીસ ટીમે આરોપીઓ પાસેથી કુલ રૂ. ૩,૮૩,૭૫૦/- નો મુદ્દામાલ જપ્ત કર્યો છે. એલસીબીના પોલીસ સ્ટાફ પેટ્રોલિંગમાં હતો, ત્યારે તેમને ચોક્કસ બાતમી મળી હતી કે ચંદાજી ગોળિયા ગામની સીમમાં આવેલા પરેશકુમાર ખેતાજી માળીના ખેતરમાં તીનપત્તીનો જુગાર ચાલી રહ્યો છે. આ બાતમીના આધારે પોલીસે તાત્કાલિક દરોડો પાડ્યો હતો. પોલીસે ઘટનાસ્થળેથી જુગાર રમી રહેલા ૨૦ આરોપીઓની ધરપકડ કરી હતી. તેમની પાસેથી ગંજીપાના, રોકડા રૂ. ૨૩,૭૫૦/-, ૧૬ મોબાઈલ ફોન (કિંમત રૂ. ૮૦,૦૦૦/-), અને ૮ મોટર સાયકલ (કિંમત રૂ. ૨,૮૦,૦૦૦/-) મળી કુલ રૂ. ૩,૮૩,૭૫૦/-નો મુદ્દામાલ કબજે કર્યો હતો. આરોપીઓ પર જુગારધારા હેઠળ ડીસા રૂરલ પોલીસ સ્ટેશનમાં કાયદેસરની કાર્યવાહી હાથ ધરવામાં આવી છે. પોલીસની આ કાર્યવાહીથી જુગારીઓમાં ફફડાટ ફેલાયો છે અને જિલ્લામાં ગેરકાયદેસર પ્રવૃત્તિઓ પર અંકુશ લાવવામાં એલસીબી પોલીસને સફળતા મળી છે. જ્યારે ડીસા રૂરલ પોલીસ સ્ટેશનમાં ફરજ બજાવતા ડી સ્ટાફ અને સ્થાનીક બીટ જમાદારની કામગીરી પર સવાલો ઉભા થયા છે. જો એલસીબી પોલીસ જિલ્લામાંથી આવી જુગારધામ ઝડપી શકતી હોય તો સ્થાનિક પોલીસ શું કરતી હતી?  ડીસા રૂરલ પોલીસ સ્ટેશનના બાહોશ પીઆઈ દ્વારા ડી સ્ટાફ અને બીટ જમાદારોને ફરજનું ભાન કરાવે તે  જરૂરી છે.