નગરપાલિકા જાતે ડિમોલિશન કરી ખર્ચ પણ વસૂલશે,દબાણદારોમાં ફફડાટ
નકશા વિરુદ્ધ બાંધકામ અને હાઇવે ઓથોરિટીના નિયમોનું પણ ઉલ્લંઘન
ડીસા નગરપાલિકા વિસ્તારમાં આવેલ શોપિંગ સેન્ટર મંજૂર કરેલા નકશા વિરુદ્ધ તેમજ નેશનલ હાઈવે ઓથોરિટી ઓફ ઈન્ડિયાના નિયમોનું ઉલ્લંઘન કરીને કરવામાં આવેલા ગેરકાયદેસર બાંધકામો સામે નગરપાલિકા તંત્રે હવે લાલ આંખ કરી છે. વારંવાર આપેલી નોટીસો છતાં બાંધકામ દૂર ન કરાતા, પાલિકાએ આગામી 15 મે 2026 સુધીમાં સ્વૈચ્છિક રીતે બાંધકામ દૂર કરવાની આખરી ચેતવણી આપી છે.
ડીસાના રે.સ.નં. 83 પૈકીના પ્લોટ નં. 32 માં આવેલ 'શ્રીજી સ્કેવર' તથા અન્ય મિલકત ધારકો દ્વારા નગરપાલિકાના મંજૂર પ્લાન કરતા વધારાનું બાંધકામ કરવામાં આવ્યું હોવાનું તંત્રના ધ્યાન પર આવ્યું હતું. આ બાબતે ઓગસ્ટ-2024 થી ફેબ્રુઆરી- 2025 સુધી છ જેટલી નોટીસો આપી બાંધકામ અટકાવવા જાણ કરવામાં આવી હતી. તેમ છતાં કામગીરી ચાલુ રાખતા, ટી.પી. કમિટીએ ઠરાવ પાસ કરી ટી.પી. એક્ટની કલમ 36 હેઠળ આકરું વલણ અપનાવ્યું છે.મિલકત ધારકો દ્વારા એવો બચાવ કરવામાં આવ્યો હતો કે તેઓને હાઇવે ઓથોરિટીની મંજૂરીની જરૂર નથી. જોકે, નગરપાલિકાએ સ્પષ્ટ કર્યું છે કે કલેક્ટર બનાસકાંઠાના રિવાઈઝ એન.એ. ઓર્ડરની શરતો તેમજ પાલિકાની પરવાનગીની શરત મુજબ હાઇવે ઓથોરિટીની એન.ઓ.સી. મેળવવી ફરજિયાત હતી, જેનું પાલન કરવામાં આવ્યું નથી.તેથી નગરપાલિકા દ્વારા સ્થળ પર જઈને વધારાના બાંધકામનું ડિમાર્કેશન (નિશાની) કરવામાં આવશે.
ડિમાર્કેશન મુજબનું ગેરકાયદેસર બાંધકામ દૂર કરવા માટે 15 મે 2026 ની આખરી સમય મર્યાદા નક્કી કરવામાં આવી છે.જો નિયત સમયમાં બાંધકામ દૂર નહીં કરાય, તો નગરપાલિકા પોતાના સાધનોથી ડિમોલિશન કરશે. આ પ્રક્રિયામાં થનાર તમામ ખર્ચ પણ મિલકત માલિક પાસેથી વસૂલવામાં આવશે. ડિમોલિશન દરમિયાન સ્ટ્રક્ચરને થતા નુકસાન કે કોઈ જાનહાનિ માટે સંપૂર્ણ જવાબદારી મિલકત ધારકની રહેશે.નગરપાલિકાના આ કડક વલણથી ગેરકાયદેસર બાંધકામ કરનારાઓમાં ફફડાટ વ્યાપી ગયો છે.
