ડીસાના ગાયત્રી સર્કલ પર રોંગ સાઈડમાં દોડતા વાહનો સામે કડક કાર્યવાહી કરાઈ

ડીસા શહેરમાં માર્ગ અકસ્માતોની સંખ્યા ઘટાડવા માટે ડીસા શહેર પોલીસ અને ટ્રાફિક પોલીસ દ્વારા નિયમોનું ઉલ્લંઘન કરનારા વાહન ચાલકો સામે કડક કાર્યવાહી શરૂ કરવામાં આવી છે. આ કાર્યવાહીના ભાગરૂપે ગાયત્રી સર્કલ વિસ્તારમાં 'રોંગ સાઈડ'માં આવતા વાહનો સામે ખાસ ઝુંબેશ હાથ ધરવામાં આવી હતી, જેના કારણે વાહન ચાલકોમાં ફફડાટ વ્યાપી ગયો છે. નેશનલ હાઈવે ઓથોરિટી દ્વારા સર્વિસ રોડ પરથી હાઈવે પર આવેલી સોસાયટીઓમાં અવરજવર માટે યોગ્ય વ્યવસ્થા ન હોવાને કારણે સોસાયટીના રહીશો 'રોંગ સાઈડ'માં અવરજવર કરવા મજબૂર બન્યા છે. આ મજબૂરીને કારણે અનેકવાર નાના-મોટા અકસ્માતો સર્જાયા હોવાની ફરિયાદો ઉઠી છે. જોકે, ટ્રાફિક સમસ્યાને દૂર કરવા માટે પોલીસે આજે સખત પગલાં લીધા હતા.ડીસા ટ્રાફિક પોલીસે ગાયત્રી સર્કલ પર ટ્રાફિક સમસ્યાને હળવી કરવા માટે સપાટો બોલાવ્યો હતો. 'રોંગ સાઈડ'માં દોડતા સંખ્યાબંધ વાહનોને ડિટેઈન કરવામાં આવ્યા હતા, જેનાથી નિયમભંગ કરનારા વાહનચાલકોમાં ફફડાટ ફેલાયો છે. સ્થાનિક નાગરિકો તરફથી ગાયત્રી સર્કલ પર અડિંગો જમાવીને બેઠેલા પેસેન્જર વાહનો સામે પણ કડક કાર્યવાહી કરીને સર્વિસ રોડ ખુલ્લો મુકવામાં આવે તેવી માગણી કરવામાં આવી રહી છે.વળી, બીજી તરફ ડીસા હાઈવે પર કાળા કાચ લગાવીને ફરતા ફોર-વ્હીલર વાહનચાલકો સામે પણ પોલીસે કડક કાર્યવાહી હાથ ધરી છે, જેનાથી આવા વાહનચાલકોમાં પણ ગભરાટ જોવા મળી રહ્યો છે.શહેરની જનતામાં એવી માગ ઉઠી છે કે, ટ્રાફિક સમસ્યાને દૂર કરવા અને માર્ગ નિયમોનું પાલન કરાવવા માટે પોલીસ દ્વારા આ પ્રકારની કડક કાર્યવાહી રોજબરોજ ચાલુ રાખવામાં આવે.