પાલનપુર શહેરમાં તંત્રની બેદરકારી કે અણઆવડતનો વધુ એક નમૂનો સામે આવ્યો છે. પાલનપુર-ડીસા હાઇવે પર દિવસ દરમિયાન જ સ્ટ્રીટ લાઈટો ચાલુ જોવા મળતા લોકોમાં આશ્ચર્ય ફેલાયું હતું. મળતી માહિતી મુજબ પાલનપુર- ડીસા હાઇવે પર આવેલા દેવપુરા બ્રિજ ઉપર ધોળે દહાડે સ્ટ્રીટ લાઈટો ઝળહળતી જોવા મળી હતી. માત્ર બ્રિજ ઉપર જ નહીં પરંતુ બ્રિજની નીચે બંને બાજુ આવેલા સર્વિસ રોડ પરના વીજ પોલ ઉપર લગાવવામાં આવેલી સ્ટ્રીટ લાઈટો પણ ચાલુ હાલતમાં જોવા મળી હતી.
એક તરફ વીજળી બચાવવા અને ઊર્જા સંરક્ષણ અંગે સરકાર દ્વારા સતત જાગૃતિ અભિયાન ચલાવવામાં આવી રહ્યા છે, ત્યારે દિવસ દરમિયાન સ્ટ્રીટ લાઈટો ચાલુ રહેતા તંત્રની કામગીરી સામે પ્રશ્નો ઉભા થયા છે. સ્થાનિક લોકો અને વાહન ચાલકોએ આ બાબતે આશ્ચર્ય વ્યક્ત કર્યું હતું.સ્થાનિકોના મતે આવી બેદરકારી ના કારણે વીજળીનો બિનજરૂરી વપરાશ થાય છે તેમજ સરકારી ખર્ચમાં પણ વધારો થાય છે. જવાબદાર વિભાગ દ્વારા સમયસર દેખરેખ રાખી આવી ખામીઓ દૂર કરવામાં આવે તેવી લોકો માંગ કરી રહ્યા છે.
