સાબરકાંઠા પોલીસ અને LCB ટીમે વિદેશી દારૂનો જથ્થો ઝડપી પાડ્યો 38.09 લાખનો મુદ્દામાલ કબ્જે

સાબરકાંઠા જિલ્લા પોલીસ અને એલસીબીની ટીમે બેરણા નજીક શામળાજી તરફથી આવી રહેલા એક ડાર્ક પાર્સલના વાહનમાંથી મોટી માત્રામાં વિદેશી દારૂનો જથ્થો ઝડપી પાડ્યો છે. પોલીસને મળેલી બાતમીના આધારે ખોડિયાર હોટલ નજીક નાકાબંધી કરી DL.1.MB.1636 નંબરના વાહનને અટકાવ્યું હતું. વાહનની તપાસ દરમિયાન પોલીસને 437 પેટીમાં કુલ 8,700 બોટલ વિદેશી દારૂ મળી આવ્યો હતો, જેની કિંમત રૂ. 28.07 લાખ આંકવામાં આવી છે. પોલીસે વાહનમાંથી હરિયાણાના બે શખ્સો - પ્રદીપ મહેન્દ્ર નાયી (35) અને બીટ્ટુ છજુરામ નાયી (29)ની ધરપકડ કરી છે. પોલીસે દારૂનો જથ્થો, બે મોબાઈલ ફોન અને રૂ. 10 લાખની કિંમતનું વાહન મળી કુલ રૂ. 38.09 લાખનો મુદ્દામાલ કબ્જે કર્યો છે. આ કેસમાં વધુ બે આરોપીઓ - રાજકુમાર (જેણે દારૂ ભરેલું વાહન ગુજરાત મોકલ્યું) અને ગુજરાતમાં દારૂ મંગાવનાર વ્યક્તિ હજુ ફરાર છે. હિંમતનગર એ-ડિવિઝન પોલીસ સ્ટેશનમાં ચારેય આરોપીઓ વિરુદ્ધ ગુનો નોંધવામાં આવ્યો છે અને ફરાર આરોપીઓની શોધખોળ શરૂ કરવામાં આવી છે. આ કાર્યવાહી દરમિયાન એલસીબીની ટીમે પેટ્રોલિંગ દરમિયાન મળેલી બાતમીના આધારે સફળતાપૂર્વક દારૂની હેરાફેરી અટકાવી હતી.