વર્ષ દરમિયાન આવતી ચાર નવરાત્રિમાં આસો સુદની શારદીય નવરાત્રિનું વિશેષ મહત્ત્વ છે. આ નવરાત્રિની ખેલૈયાઓ આતુરતાથી રાહ જોતા હોય છે. શહેરોમાં પાર્ટી પ્લોટ અને વિવિધ સ્થળોએ ગરબાનાં ભવ્ય આયોજનો થતાં હોય છે, પરંતુ શક્તિપીઠ અંબાજી મંદિરના પવિત્ર ચાચરચોકમાં ગરબા રમવાનો આનંદ જ કંઈક અલગ હોય છે.
નવરાત્રિના પ્રથમ દિવસે અંબાજી ખાતે માં અંબેના દર્શન માટે શ્રદ્ધાળુઓનો ભારે ધસારો જોવા મળ્યો હતો. પ્રથમ નોરતે સાડા ચાર લાખથી વધુ શ્રદ્ધાળુઓએ માં અંબેનાં દર્શનનો લાભ લીધો હતો. આ સાથે મંદિરમાં ઘટસ્થાપનની ધાર્મિક વિધિ પણ સંપન્ન કરવામાં આવી હતી.
દરમિયાન, સુરતથી અંબાજી આવેલી યુવતીઓએ પણ ચાચરચોકમાં ગરબે ઘૂમીને માં અંબેની આરાધના કરી હતી. તેમણે દર વર્ષે અંબાજી આવીને ગરબા રમવાની ઇચ્છા વ્યક્ત કરતાં જણાવ્યું હતું કે, માં અંબેના પવિત્ર ચાચરચોકમાં ગરબા રમવાથી અનોખો આનંદ અને આધ્યાત્મિક અનુભૂતિ થાય છે. આમ, નવરાત્રિના પ્રથમ નોરતે જ ચાચરચોક ભક્તિ અને ગરબાના રંગે રંગાયો હતો. માં અંબેના દર્શન સાથે ગરબાની રમઝટ માણવા ઉમટેલા શ્રદ્ધાળુઓ અને ખેલૈયાઓને કારણે અંબાજીમાં નવરાત્રિનો ઉત્સવ ઉત્સાહભેર શરૂ થયો હતો.
