ઊંઝા પંથકમાં મેઘરાજાની એન્ટ્રી: ખરીફ પાકોને જીવતદાન મળ્યું

ખેડૂતો માટે આકાશમાંથી કાચું સોનું વરસતાં જગતનો તાત ખુશખુશાલ 

 ઊંઝા પંથકમાં બે દિવસથી વરસાદી માહોલ જામ્યો છે  વાતાવરણમાં પલટો આવતાં કાળા ડીબાંગ વાદળો બાદ વરસાદ પડી રહ્યો છે. ઊંઝા શહેર સહિત તાલુકામાં  વરસાદ વરસતાં ખરીફ પાકોને જીવતદાનથી જગતનો તાત ખુશખુશાલ જોવા મળી રહ્યો છે. ગરમીનો પારો ઊંચકાતા અસસહ્ય ઉકળાટ અને બફારા લોકો ત્રસ્ત બન્યા હતા. જેને લઈ વરસાદ પડતા વાતાવરણમાં ઠંડક પ્રસરી જવા પામી હતી.

 ખેડૂતો માટે આકાશમાંથી કાચું સોનું વરસી રહ્યું છે. ઊંઝા પંથકમા ખરીફ પાકોનું વાવેતર થયું છે. જેમાં દિવેલા પાકોનું વાવેતર તેમજ કઠોળમાં મગ, અડદ, તુવેર જ્યારે અનાજમાં બાજરી, જુવાર અને રોકડીયા પાકમાં એરંડા, ગુવારના વાવેતરને આ વરસાદથી ફાયદો થશે. ઊંઝા પંથકમાં મેઘાએ વિરામ લેતા ખેડૂતોમાં ચિંતા જોવા મળી હતી. વરસાદ નહીં આવતા ખેતરમાં ઊભેલ પાક સુકાવા લાગ્યો હતો. જોકે ભાદરવામાં વરસાદ શરૂ થયો છે. ઊંઝા પંથક સહિત તાલુકામાં આકાશમાંથી વરસી રહેલ કાચા સોનાથી ખેડૂતોમાં ખુશી છવાઈ છે.