બનાસકાંઠા જિલ્લામાં સ્થાનિક સ્વરાજ્યની ચૂંટણીનો માહોલ ધીમે ધીમે ગરમાઈ રહ્યો છે. પરંપરાગત હરીફ ભાજપ અને કોંગ્રેસ બંને પક્ષો ઉમેદવારોની પસંદગી મામલે ખૂબ જ સાવચેતીપૂર્વક આગળ વધી રહ્યા છે. તે વચ્ચે ડીસા તાલુકાના કોંગ્રેસના ગઢ ગણાતા જુનાડીસા ગામની જિલ્લા પંચાયત બેઠક પર રાજકીય હલચલ તેજ બની છે. જુનાડીસા તાલુકાનું સૌથી મોટું અને શિક્ષિત ગામ ગણાય છે, જ્યાં વર્ષોથી જિલ્લા પંચાયત બેઠક પર કોંગ્રેસ ઉમેદવારોની જીત નોંધાતી આવી છે. પરંતુ આ વખતે સલામત માનાતી આ બેઠક પર કોંગ્રેસ મોવડી મંડળ દ્વારા આયાતી ઉમેદવાર ઉતારવાની સંભાવના સામે આવતા સ્થાનિકોમાં અસંતોષ ફાટી નીકળ્યો છે.
ગામલોકોએ એકસુરે તેનો વિરોધ નોંધાવી સ્પષ્ટ માંગણી કરી છે કે, ટિકિટ સ્થાનિક અને યુવા ઉમેદવારને જ આપવામાં આવે. સ્થાનિક લોકોનું કહેવું છે કે જો પક્ષ દ્વારા બહારથી ઉમેદવાર લાવવામાં આવશે તો તેઓ તેનો કડક વિરોધ કરશે અને પરિણામે કોંગ્રેસને આ બેઠક ગુમાવવાનો વારો પણ આવી શકે છે.
આ પરિસ્થિતિ વચ્ચે કોંગ્રેસમાં આંતરિક ઘર્ષણના એંધાણ સ્પષ્ટ દેખાઈ રહ્યા છે. હવે મોવડી મંડળ માટે પડકાર એ છે કે તે સ્થાનિક લોકોની લાગણીઓનું માન રાખી યોગ્ય ઉમેદવાર પસંદ કરે. જો સ્થાનિક સમર્થન ધરાવતા ઉમેદવારને તક આપવામાં આવે તો કોંગ્રેસ માટે જીતનો રસ્તો સરળ બની શકે છે, નહીં તો વિરોધના વંટોળમાં આ બેઠક ગુમાવવાની શક્યતા પણ નકારી શકાય તેવી નથી.
