"બનાસકાંઠામાં માનવતાને શર્મશાર કરતું અને કાળજું કંપી જાય તેવું બાળ તસ્કરીનું રેકેટ સામે આવ્યું છે. પાલનપુર-અંબાજી હાઈવે પર ધનપુરા પાટિયા નજીકથી 6 તારીખે અપહરણ કરાયેલા 4 વર્ષના માસૂમ બાળકને પોલીસે ગણતરીના કલાકોમાં મોતના મુખમાંથી ઉગારી લીધું છે." "ઘટનાની જાણ થતા જ જિલ્લા પોલીસ વડા પ્રશાંત સુંબેના માર્ગદર્શન હેઠળ 'ઓપરેશન દેવ' શરૂ કરવામાં આવ્યું હતું. વડગામ પોલીસ, LCB, SOG અને પેરોલ ફ્લો સ્ક્વોડની 7 અલગ-અલગ ટીમો મેદાને ઉતરી હતી. 80 કિલોમીટર સુધીના સીસીટીવી ફૂટેજ ફંગોળ્યા બાદ, માત્ર 4 કલાકમાં જ પોલીસે આરોપીઓને આંતરી લીધા હતા."
"ઝડપાયેલા આરોપી શૈલેષ ગમાર અને બાબુ ભગોરાની પૂછપરછમાં જે વિગતો બહાર આવી તે ચોંકાવનારી છે. આ ટોળકી નાના બાળકોનું અપહરણ કરી અન્ય રાજ્યોમાં એક થી દોઢ લાખ રૂપિયામાં વેચી દેતી હતી. જો પોલીસે ત્વરિત કાર્યવાહી ન કરી હોત, તો આ બાળકને રાજ્ય બહાર મોકલી દેવાની પૂરેપૂરી તૈયારી હતી."
"તપાસમાં એ પણ ખુલ્યું છે કે આરોપી શૈલેષે અગાઉ એક બાળકીને પણ 1 લાખ રૂપિયામાં વેચી હતી. હાલમાં પોલીસે બાળકને તેના પરિવારને સોંપીને અન્ય સંડોવાયેલા શખ્સોની શોધખોળ તેજ કરી છે. બનાસકાંઠા પોલીસની આ કામગીરીને અત્યારે ચારેતરફથી બિરદાવવામાં આવી રહી છે."
