પરપ્રાંતિયોની સઘન પૂછપરછથી ફફડાટ
ઊંઝા તાલુકાના ઉનાવા પંથકમાં કાયદો અને વ્યવસ્થાની સ્થિતિ વધુ મજબૂત કરવાના ભાગરૂપે ઉનાવા પી.એસ.આઈ એસ.વી.પઢારીયા, મહેસાણા એસ.ઓ.જી. પી.એસ.આઈ એમ.ડી.ડાભી ની ટીમ દ્વારા અચાનક સર્ચ ઓપરેશન હાથ ધર્યું છે. ઉનાવા પોલીસ અને મહેસાણા એસઓજી (Special Operations Group)ની ટીમોએ સંયુક્ત રીતે સ્થાનિક ગેસ્ટ હાઉસ અને હોટેલોમાં આકસ્મિક ચેકિંગ હાથ ધર્યું હતું. પોલીસ ટીમોએ વિસ્તારની તમામ હોટેલો અને મુસાફિરખાનાઓમાં રોકાયેલા લોકોની પ્રોફાઇલ ચેક કરી હતી. ખાસ કરીને અન્ય રાજ્યોમાંથી આવીને રોકાયેલા પરપ્રાંતિય મુસાફરો તેમજ શંકાસ્પદ હિલચાલ ધરાવતી વ્યક્તિઓની આગવી ઢબે પૂછપરછ કરવામાં આવી હતી. આ ઉપરાંત તેમની ઓળખના પુરાવા અને જરૂરી દસ્તાવેજોની પણ બારીકાઈથી ચકાસણી કરાઈ હતી.
સૂત્રોના જણાવ્યા અનુસાર, વિસ્તારમાં કોઈ પણ પ્રકારની ગુનાહિત કે ગેરકાયદેસર પ્રવૃત્તિ ન પાંગરે અને સુરક્ષા વ્યવસ્થા લોખંડી બને તે મુખ્ય હેતુથી આ મેગા ઓપરેશન ગોઠવવામાં આવ્યું હતું. પોલીસની આ અણધારી એન્ટ્રીથી હોટેલ સંચાલકો અને તત્વોમાં ભારે ફફડાટ વ્યાપી ગયો હતો. સર્ચ ઓપરેશન દરમિયાન પોલીસે તમામ હોટેલ અને ગેસ્ટ હાઉસના માલિકો તેમજ મેનેજરો સાથે બેઠક કરી કડક સૂચનાઓ આપી હતી. મુસાફરોની એન્ટ્રી બુક નિયમિત રાખવા, સીસીટીવી કેમેરા ચાલુ રાખવા અને આઈડી પ્રૂફ વગર કોઈને પણ રૂમ ન આપવા માટે તાકીદ કરવામાં આવી છે. નિયમોનું ઉલ્લંઘન કરનાર સામે કાયદેસરની કાર્યવાહી કરવાની ચીમકી પણ આપવામાં આવી છે.
