બનાસકાંઠા જિલ્લાના બોર્ડર વિસ્તારોમાં થર્ટી ફર્સ્ટને લઈ પોલીસનું સઘન વાહન ચેકિંગ

થર્ટી ફર્સ્ટ સેલિબ્રેશન દરમિયાન કાયદો અને વ્યવસ્થા જળવાઈ રહે તેમજ નશીલા પદાર્થો અને ગેરકાયદેસર પ્રવૃત્તિઓ પર નિયંત્રણ રાખવા બનાસકાંઠા જિલ્લાના બોર્ડર વિસ્તારોમાં સઘન વાહન ચેકિંગ હાથ ધરવામાં આવ્યું છે. ગુંદરી, અમીરગઢ, નેનાવા સહિત રાજસ્થાન સાથે લાગતી બોર્ડર પર પોલીસે ચેકપોસ્ટ પર તૈનાતી વધારી છે. ચેકીંગ દરમિયાન એસઆરપીએફ, પોલીસ તથા હોમગાર્ડના જવાનો ખડેપગે ફરજ બજાવી રહ્યા છે. રાજસ્થાનથી ગુજરાતમાં પ્રવેશતા દરેક વાહનોની વિગતવાર તપાસ કરવામાં આવી રહી છે, જેથી નશીલા પદાર્થો, દારૂ અથવા કોઈ ગેરકાયદેસર માલસામાન રાજ્યમાં ન ઘુસે તે સુનિશ્ચિત થાય. પોલીસ અધિકારીઓના જણાવ્યાં મુજબ, 31મીની ઉજવણીમાં કાનૂની ભંગ ન થાય અને લોકો સુરક્ષિત રીતે ઉજવણી કરી શકે તે હેતુથી આ કડક ચેકિંગ અભિયાન ચાલુ રાખવામાં આવશે.