થરાદના વાંતડાઉ ચેકપોસ્ટ પરથી લાખોના MD ડ્રગ્સ સાથે એક ઝડપાયો

આગામી તાજીયા અને મોહરમના તહેવારોને ધ્યાનમાં રાખીને થરાદ પોલીસ એલર્ટ પર છે, ત્યારે જ પોલીસે બોર્ડર પરથી લાખો રૂપિયાના ઘાતક મેફેડ્રોન એટલે કે MD ડ્રગ્સના મોટા જથ્થા સાથે એક શખ્સને દબોચી લીધો છે.મળતી વિગત અનુસાર, જિલ્લા પોલીસ વડા ચિંતન તેરૈયાની 'ઝીરો ટોલરેન્સ' નીતિ અંતર્ગત ગુજરાત અને રાજસ્થાન સરહદને જોડતી વાંતડાઉ ચેકપોસ્ટ પર સઘન વાહન ચેકિંગ ચાલી રહ્યું હતું. આ દરમિયાન એક શખ્સ મોપેડ પર શંકાસ્પદ હાલતમાં પસાર થતાં થરાદ પીઆઇ એ.જી. રબારી અને તેમની ટીમે તેને રોકી તલાશી લીધી હતી. તપાસ દરમિયાન તેની પાસેથી ૨૯.૫૭ ગ્રામ મેફેડ્રોન ડ્રગ્સ મળી આવ્યું હતું, જેની બજાર કિંમત અંદાજે ૮૮ હજાર રૂપિયાથી વધુ છે. પોલીસે ડ્રગ્સ અને મોપેડ મળીને કુલ રૂ. ૧,૪૮,૭૧૦ નો મુદ્દામાલ જપ્ત કર્યો છે. પકડાયેલા આરોપીની ઓળખ સાજીદખાન ઉર્ફે આતિશ અયુબભાઈ રાઉમા, રહેવાસી થરાદ વખારવાસ તરીકે થઈ છે.થરાદ પોલીસે આરોપી વિરૂદ્ધ NDPS એક્ટ હેઠળ ગુનો નોંધીને જેલના સળિયા પાછળ ધકેલી દીધો છે. પ્રાથમિક પૂછપરછમાં આરોપીએ આ માદક પદાર્થ પહેલીવાર લાવ્યો હોવાની કબૂલાત કરી છે. જો કે, આ ડ્રગ્સ નેટવર્કના તાર રાજસ્થાનના સાંચોર સાથે જોડાયેલા છે, જેમાં સામેલ અન્ય આરોપી અરમાન ચૌહાણને પકડવા માટે પોલીસે ચક્રો ગતિમાન કર્યા છે.