દૂધ મંડળીમાં ટેસ્ટર દૂધની ચોરી કરતાં લોકોના ટોળેટોળા ઉમટ્યા
ડીસા તાલુકાના ગેનાજી ગોળીયામાં શ્રી ગેનાજી ગોળીયા દૂધ ઉત્પાદક સેવા સહકારી મંડળીમાં દરરોજ ખેડૂતો દૂધ ભરાવવા બે ટાઇમ આવે છે. ત્યારે દૂધ મંડળીમાં ટેસ્ટર બંને ટાઇમ દૂધનું સેમ્પલ લઇ ખેડૂતોનું દૂધ ભરે છે. ત્યારે ખેડૂતોના દૂધની ઘટની જાણ થતાં દૂધ મંડળીના મંત્રી ઇશ્વરજી છોગાજી ગેલોત (માળી) અને ચેરમેન શંકરજી દલાજી ગેલોત (માળી) સી.સી.ટી.વી. કેમેરાના ફૂટેજના આધારે તપાસ હાથ ધરતાં સંજયકુમાર રમેશભાઇ ગેલોત (માળી) દરરોજ સવારે અને સાંજે બે ટાઇમ છ માસથી 40 લીટરથી વધુની ચોરી કરતો હોવાનું માલૂમ મળ્યું હતું.
ત્યારે દૂધ મંડળીના અધિકારી ભરતભાઇ પટેલે જાણ કરતાં તેઓ પણ તાત્કાલીક શ્રી ગેનાજી ગોળીયા દૂધ ઉત્પાદક સેવા સહકારી મંડળીમાં દોડી આવ્યા હતા અને તપાસ હાથ ધરી હતી. જ્યારે લોકોના ટોળેટોળા ઉમટ્યા હતા. આ અંગે ડીસા તાલુકા પોલીસ મથકે ટેસ્ટર સામે ગુનો નોંધવાની તજવીજ હાથ ધરી છે. જો કે, અગાઉ પણ શ્રી ગેનાજી ગોળીયા દૂધ ઉત્પાદક સેવા સહકારી મંડળીમાં રૂ. 62 લાખથી વધુનું કૌભાંડ હોવાનું જાણવા મળ્યું છે.
