મહેસાણા જિલ્લા પંચાયતના પ્રમુખ અને ઉપપ્રમુખ પદની વરણી માટે તાજેતરમાં ચૂંટાયેલા સદસ્યોની પ્રથમ સામાન્ય સભા આજે યોજાઈ હતી. આ બેઠક જિલ્લા પંચાયત મહેસાણાના પંડિત દીનદયાળ કોમ્યુનિટી હોલ ખાતે, અધ્યાસી અધિકારી અને જિલ્લા કલેક્ટર એસ. કે. પ્રજાપતિના અધ્યક્ષસ્થાને રાખવામાં આવી હતી.
આ ચૂંટણી પ્રક્રિયા અંતર્ગત ૨૨ મે ૨૦૨૬ના રોજ બપોરે ૧૪:૦૦ કલાક સુધીમાં જિલ્લા પંચાયતના સચિવ અને જિલ્લા વિકાસ અધિકારી સમક્ષ ઉમેદવારી પત્રો રજૂ કરવામાં આવ્યા હતા. જેમાં પ્રમુખ પદ માટે પટેલ નીતિનભાઈ છનાભાઈ અને ઉપપ્રમુખ પદ માટે ઠાકોર માસંગજી રામાજીએ પોતાની ઉમેદવારી નોંધાવી હતી. નિયત સમયે હાથ ધરાયેલી ચકાસણી દરમિયાન બંને ઉમેદવારોના પત્રો માન્ય જાહેર કરાયા હતા.
આજની સામાન્ય સભામાં સર્વાનુમતે અને બહુમતી સાથે ચૂંટણીના પરિણામો જાહેર કરવામાં આવ્યા છે. જિલ્લા પંચાયત પ્રમુખ પટેલ નીતિનભાઈ છનાભાઈને મહેસાણા જિલ્લા પંચાયતના પ્રમુખ તરીકે બિનહરીફ ચૂંટાયેલા જાહેર કરવામાં આવ્યા છે. જ્યારે ઠાકોર માસંગજી રામાજીને મહેસાણા જિલ્લા પંચાયતના ઉપપ્રમુખ તરીકે બિનહરીફ ચૂંટાયેલા જાહેર કરવામાં આવ્યા છે. બંને પદો પર એક-એક જ માન્ય ઉમેદવારી હોવાથી, પ્રમુખ અને ઉપપ્રમુખની આ વરણી કોઈપણ વિરોધ વિના, પૂર્ણ બહુમતી સાથે બિનહરીફ સંપન્ન થઈ છે.
