મોડાસાના અમલાઈ કંપા નજીક ટ્રેક્ટરના સ્પાર્ટ્સ ભરેલી ટ્રકમાં ભીષણ આગ: લાખોનું નુકસાન

અરવલ્લી જિલ્લાના મોડાસા તાલુકાના અમલાઈ કંપા નજીકથી પસાર થઈ રહેલી એક ટ્રકમાં વહેલી સવારે અચાનક આગ ભભૂકી ઊઠતાં ભારે અફરાતફરી મચી જવા પામી હતી. મુંબઈથી ટ્રેક્ટરના સ્પેરપાર્ટ્સ ભરીને જયપુર તરફ જઈ રહેલી આ ટ્રક જ્યારે અમલાઈ કંપા પાસેથી પસાર થઈ રહી હતી, તે દરમિયાન વહેલી સવારે ચાલુ ટ્રકના પાછળના ભાગે અગમ્ય કારણોસર એકાએક આગ લાગી ગઈ હતી. જોતજોતામાં આગે વિકરાળ સ્વરૂપ ધારણ કરી લેતાં ટ્રકમાં ભરેલા ટ્રેક્ટરના સ્પેરપાર્ટ્સ સળગી ઊઠ્યા હતા અને લાખો રૂપિયાનો મુદ્દામાલ બળીને ખાખ થઈ ગયો હતો. ઘટના અંગે તાકીદે જાણ કરવામાં આવતાં મોડાસા નગરપાલિકાની ફાયર બ્રિગેડની ટીમ તુરંત જ ઘટનાસ્થળે દોડી આવી હતી અને ભારે જહેમત બાદ પાણીનો મારો ચલાવી આગ પર સંપૂર્ણ કાબૂ મેળવ્યો હતો.