વરસડા ગામેથી ૬ જુગારીયા પકડાયા
ભાવનગર લઠ્ઠાકાંડ બાદ ઓગડ તાલુકાના થરા પોલીસ સ્ટેશન હદમાં ખુલ્લેઆમ દેશી વિદેશી દારૂ બેફામ વેચાઈ રહયો છે અને શ્રાવણીયા તથા વરલી જુગારના અડ્ડાઓ ધમધમે છે. ત્યારે આ બદ્દી થરા પોલીસને કેમ દેખાતી નથી ? શું હપ્તાખોરીની જાળમાં ફસાયેલ થરા પોલીસ લાચાર બની છે. ઓવર લોડ રેત ભરીને દોડતા ટબાઁ ટ્રકો નગરમાં ટ્રાફિક સમસ્યાને વિકટ બનાવી રહી છે. આ બધા વચ્ચે થરા પોલીસે બાહોશી બતાવી વરસડા ગામમાંથી જુગાર રમતા છ લોકોને ઝડપી પાડ્યા છે. આ કાર્યવાહી રાત્રિ પેટ્રોલિંગ દરમિયાન ખાનગી બાતમીના આધારે કરવામાં આવી હતી.
પોલીસે વરસડા ગામની વચ્ચે આવેલા ખુલ્લા ચોકમાં દરોડો પાડ્યો હતો. આરોપીઓ ગંજીપાના વડે પૈસાની હારજીતનો જુગાર રમી રહ્યા હતા. પોલીસે જુગારના સાહિત્ય સાથે રોકડ રૂ. ૨૪૭૦ નો મુદ્દામાલ જપ્ત કર્યો હતો. ઝડપાયેલા આરોપીઓમાં ઈશ્વર વિહાભાઈ પરમાર, પ્રકાશ નાનજીભાઈ ચૌધરી, રમેશ ડુંગરજી ઠાકોર, મહેશ વશરામજી ઠાકોર, વિજય જેઠાભાઈ ઠાકોર અને ભરત વાલજીજી ઠાકોરનો સમાવેશ થાય છે. તમામ ૬ આરોપીઓને થરા પોલીસ સ્ટેશન લાવવામાં આવ્યા હતા. પોલીસે તેમની વિરુદ્ધ કાયદેસરની કાર્યવાહી હાથ ધરી છે.
