ખેરાલુમાં આજે બપોરના સમયે એક ગમખ્વાર અકસ્માત સર્જાયો હતો. સિદ્ધપુર ચોકડી તરફથી પૂરપાટ ઝડપે આવી રહેલી એક ક્રેટા કારના ચાલકે સ્ટિયરિંગ પરનો કાબુ ગુમાવતા માઁ પેટ્રોલ પંપ નજીક લારી લઈને ફ્રૂટનો વેપાર કરતા મહેન્દ્રભાઈ નેનજીભાઈ દેવીપૂજકને જોરદાર ટક્કર મારી હતી. ટક્કર એટલી ભયંકર હતી કે, કાર લારીને ખાસ્સા અંતર સુધી ઢસડી ગઈ હતી. આ દુર્ઘટનામાં મહેન્દ્રભાઈને ગંભીર ઈજાઓ પહોંચી હતી. આસપાસના લોકોએ તાત્કાલિક દોડી આવીને ઈજાગ્રસ્તને પ્રાથમિક સારવાર માટે વડનગર ખસેડ્યા હતા, જ્યાંથી તેમની સ્થિતિ વધુ નાજુક જણાતા વધુ સારવાર અર્થે તેમને અમદાવાદની સિવિલ હોસ્પિટલમાં રિફર કરવામાં આવ્યા છે.
અકસ્માત સર્જ્યા બાદ કાર ચાલક પરિસ્થિતિનો તાગ મેળવીને ઘટનાસ્થળે જ પોતાનું વાહન મૂકીને નાસી છૂટ્યો હતો. પરંતુ, આ બનાવમાં સૌથી ચોંકાવનારી બાબત એ હતી કે દુર્ઘટનાગ્રસ્ત કારની તલાશી લેતા તેમાંથી વિદેશી દારૂ અને બિયરની બોટલો મળી આવી હતી. આ પરથી પ્રાથમિક અંદાજ લગાવવામાં આવી રહ્યો છે કે ચાલક નશાની હાલતમાં ડ્રાઇવિંગ કરી રહ્યો હતો. દારૂ ઉપરાંત કારની અંદરથી જુદી-જુદી નંબર પ્લેટો પણ મળી આવી છે, જેને કારણે આખો મામલો વધુ શંકાસ્પદ બન્યો છે. અકસ્માત વેળાએ કાર પર 'GJ 02 DP 5141' નંબરની પ્લેટ લગાવેલી હતી, પરંતુ અંદરથી મળેલી અન્ય પ્લેટોને કારણે વાહનનો અસલી નંબર કયો છે અને તેનો સાચો માલિક કોણ છે, તે અંગે અનેક સવાલો ઊભા થયા છે.
ઘટનાની જાણ થતાં જ ખેરાલુ પોલીસનો કાફલો તાબડતોબ ઘટનાસ્થળે પહોંચી ગયો હતો અને કારને જપ્ત કરી લીધી હતી. ખેરાલુ પોલીસે જણાવ્યું છે કે, કારના એન્જિન અને ચેસીસ નંબરના આધારે વાહનના સાચા માલિક અને ફરાર ચાલકની ઓળખ માટેની સઘન તપાસ શરૂ કરવામાં આવી છે. હાલમાં ઈજાગ્રસ્ત યુવકના સંબંધીઓએ નોંધાવેલી ફરિયાદના આધારે પોલીસે કાયદેસરની કાર્યવાહી હાથ ધરીને ફરાર આરોપીને પકડવા ચક્રો ગતિમાન કર્યા છે.
