છેલ્લા કેટલાક દિવસથી ભાભર વિસ્તારમાં પેટ્રોલ-ડીઝલની અછત સર્જાતા પંપ બહાર વાહનોની લાંબી કતારો લાગી છે. ખાસ કરીને ખેડૂતો ટ્રેક્ટર લઈ ડીઝલ માટે ફાંફા મારી રહ્યા છે ધોમ ધખતા તાપમાં કલાકો સુધી લાઇનમાં ઊભા રહેવાથી ખેડૂતોની હાલત કફોડી બની હતી.
આ દરમિયાન ભાભર પોલીસ સ્ટેશનના 112 સેવાના પોલીસ કર્મીઓ ખેડૂતોની મદદે આવ્યા. દરરોજ માનવતાની સેવા માટે ઉપલબ્ધ 112 ટીમના એએસઆઈ દિનેશભાઈ અને સ્ટાફે કતારમાં ઊભેલા ખેડૂતોને પાણીની બોટલની વહેંચણી કરી હતી.પોલીસની આ માનવતાભરી કામગીરીનો વીડિયો સોશિયલ મીડિયામાં વાયરલ થયો છે. વીડિયોમાં એએસઆઈ દિનેશભાઈ ખેડૂતોને પાણીની બોટલ આપતા અને તેમની હાલત પૂછતા જોવા મળી રહ્યા છે. પોલીસની આ સેવાભાવનાની લોકો પ્રશંસા કરી રહ્યા છે એક તરફ પેટ્રોલ-ડીઝલની અછતથી ખેડૂતો પરેશાન છે તો બીજી તરફ પોલીસની આવી માનવતા લોકોમાં આશાનું કિરણ જગાવી રહી છે. ભાભર સહિત સમગ્ર વાવ-થરાદ પંથકમાં હાલ અનેક જગ્યાએ પેટ્રોલ પંપ ઉપર લાંબી કતારો જોવા મળી રહી છે પોલીસ અધિકારીઓનું કહેવું છે કે કાયદો-વ્યવસ્થા જાળવવાની સાથે માનવતાની સેવા પણ અમારી પ્રાથમિકતા છે. તાપમાં ઊભેલા લોકોને રાહત મળે એ હેતુથી આ પહેલ કરવામાં આવી છે.
