બનાસકાંઠાની જીવાદોરી સમાન બનાસ નદીમાંથી રેતી ખનનનો વ્યવસાય તેજ બન્યો છે, ત્યારે કસલપુરા અને દુદાસણ પંથકમાંથી પસાર થતા ઓવરલોડ ડમ્પરો સ્થાનિકો માટે માથાનો દુખાવો બની રહ્યા છે. નિયમ કરતા વધુ રેતી ભરીને બેફામ દોડતા આ ડમ્પરો સામે હવે કડક કાર્યવાહી કરી તેમનું વજન કરવાની માંગ ઉઠી રહી છે.
કસલપુરા અને દુદાસણ ગામના માર્ગો પરથી દિવસ-રાત રેતી ભરેલા ડમ્પરોની અવરજવર રહે છે. ઓવરલોડ રેતી ભરેલી હોવાને કારણે માર્ગોને ભારે નુકસાન થઈ રહ્યું છે અને અકસ્માતનો ભય સતત તોળાઈ રહ્યો છે. સ્થાનિક લોકો અને જાગૃત નાગરિકોની માંગ છે કે નદીના પટમાંથી નીકળતા દરેક ડમ્પરનું ચોક્કસ વજન કરવામાં આવે. જો ડમ્પર ઓવરલોડ જણાય તો તેની સામે ખાણ-ખનીજ વિભાગ અને આરટીઓ દ્વારા દંડનીય કાર્યવાહી થવી જોઈએ.
