દર વર્ષે ભાવ વધારો થતા વાહનચાલકોમાં રોષ
ડીસા તાલુકાના મુડેઠાના ટોલ પ્લાઝા ઉપર એટલે કે 1 એપ્રિલથી ભાવ વધારો ઝીંકાતા વાહનચાલકો માટે દાઝયા ઉપર ડામ પુરવાર થયો છે. અને મુડેઠાના ટોલ પ્લાઝા પર નવા દરના બોર્ડ પણ મુકી દેવામાં આવ્યા છે. વાહનચાલકો પાસેથી નાના વાહનોમાં કોઇ વધારાનો ભાવ વધારવામાં આવ્યો નથી. માત્ર મોટા વાહનો પર જ 5 થી 20 રૂપિયા સુઘીનો ભાવ વધારવામાં આવ્યો છે.
નેશનલ હાઇવે ઓથોરિટી હેઠળ દેશભરના તમામ ટોલનાકાઓ ઉપર અલગ-અલગ શ્રેણીના ટોલટેક્ષ વસૂલવામાં આવશે. ત્યારે ડીસા તાલુકાના મુડેઠાના ટોલ પ્લાઝા પર પણ એટલે કે 1 એપ્રિલથી નવા રેટ લાગું પડશે. જેમાં નાના વાહનોમાં જેમાં કાર,જીપ, વાનમાં વધારો નથી થયો અને ઓવરલોડ અને ઓવરસાઈઝ અને સાત એકશલ સુધીના ભારે વાહનોમાં અલગ અલગ પ્રમાણે ભાવ વધારો આવતીકાલથી ઝીંકાશે. વાહનચાલકોને પોતાના ખિસ્સા હળવા થશે અને મોંઘવારીનો વધુ માર સહન કરવાનો વારો આવ્યો છે.
પાલનપુરથી સામખીયારી કચ્છ જેમાં ડીસા તાલુકાના મુડેઠા ગામે ટોલ પ્લાઝા આવેલ છે. જેમાં હાઈવે રોડની બાજુમાં સર્વિસ રોડ ના હોવાથી વાહનચાલકોને ફરજિયાત ટોલના પૈસા ભરવા પડે છે અને સર્વિસ રોડની વર્ષોથી માંગ છે છતાં નેશનલ હાઇવે ઓથોરિટી દ્વારા બનાવવામાં આવેલ નથી. ડીસાના મુડેઠા અને કાંકરેજના ભલગામ જ્યારે બંને ટોલનાકાના અંતર 35 કિલોમીટરની નજીકમાં હોવાથી બંને ટોલનાકે વાહનચાલકોના ખીસ્સા હળવા થઈ રહ્યા છે.
