રખડતા પશુઓનો વધતો ત્રાસ: અરવલ્લી જિલ્લાના મેઘરજમાં આખલા યુદ્ધના લાઇવ દ્રશ્યોથી વેપારીઓ-રહીશો ભયભીત

અરવલ્લી જિલ્લાના મેઘરજ શહેરમાં રખડતા પશુઓનો ત્રાસ હવે નાગરિકો માટે જીવનું જોખમ બની ગયો છે. મેઘરજના મુખ્ય બજાર અને રહેણાંક વિસ્તારમાં રખડતા આખલાઓ વચ્ચે જાહેરમાં ભયાનક જંગ ખેલાયો હતો, જેના લાઈવ દ્રશ્યો સામે આવતા જ સમગ્ર પંથકમાં ફફડાટ મચી ગયો છે. વ્યસ્ત રસ્તાઓ વચ્ચે આખલાઓ બેફામ બનીને બાખડતા વાહનચાલકો અને રાહદારીઓમાં ભારે દોડધામ મચી ગઈ હતી, જ્યારે સ્થાનિક વેપારીઓએ પોતાના જીવ બચાવવા દુકાનોના શટર ટપોટપ બંધ કરી દીધા હતા. એક જ દિવસમાં બે અલગ-અલગ જગ્યાએ સર્જાયેલી આ આખલા યુદ્ધની ઘટનાથી રહીશો ભારે ભયભીત છે અને તંત્ર સામે સ્થાનિક લોકોમાં ભારે રોષ જોવા મળી રહ્યો છે.