શ્રી મુધ્રણેશ્વર મહાદેવના પવિત્ર સાનિધ્યમાં મેળાર્થીઓનો મહાસાગર; જાદર ગ્રામ પંચાયત દ્વારા કરાયું સુવ્યવસ્થિત અને સચોટ આયોજન
સાબરકાંઠા જિલ્લાના પાવનધામ જાદર ખાતે શ્રી મુધ્રણેશ્વર મહાદેવના સાનિધ્યમાં વાર્ષિક ત્રિદિવસીય ભવ્ય લોકમેળાનો આજે ધામધૂમપૂર્વક પ્રારંભ થયો છે. દાદાના દર્શનની અસીમ શ્રદ્ધા અને મેળાના હર્ષોલ્લાસથી સમગ્ર જાદર સહિત અરાવલીની ગિરિમાળાઓ ઉત્સવમય બની ગઈ છે. વહેલી સવારથી જ શ્રદ્ધાળુઓ અને મુલાકાતીઓની વિશાળ મેદની ઉમટી પડતાં સમગ્ર વિસ્તાર લોકઉત્સવના રંગે રંગાયો છે.
મેળાના પ્રથમ દિવસે જ શ્રી મુધ્રણેશ્વર મહાદેવના ચરણોમાં શીશ નમાવી આશીર્વાદ મેળવવા વહેલી સવારથી જ ભાવિકોની કતારો જોવા મળી હતી. પુષ્પોની મનમોહક સજાવટ વચ્ચે દાદાના દિવ્ય અને રાજશાહી શૃંગારના દર્શન કરી દર્શનાર્થીઓ ભાવવિભોર બન્યા હતા. પરિસરમાં ગુંજી ઊઠેલા હર હર મહાદેવના જયઘોષથી વાતાવરણ ભક્તિમય બની ગયું હતું.
