જાનથી મારી નાખવાની ધમકી પણ આપતા ગુનો દાખલ
બનાસકાંઠા જિલ્લાના ડીસા તાલુકાના દામા ગામે જૂની અદાવત અથવા સામાન્ય બોલાચાલીમાં ગાળો બોલવા બાબતે ઠપકો આપવા ગયેલા એક જ પરિવારના સભ્યો પર હુમલો થયાની ઘટના સામે આવી છે. આ હુમલામાં આધેડને હાથ અને કપાળના ભાગે ઇજાઓ પહોંચતા સારવાર અર્થે ખસેડવામાં આવ્યા હતા.
દામા ગામના રહેવાસી પરબતભાઇ ગલબાભાઈ પરમારે નોંધાવેલી ફરિયાદ મુજબ, ગત સાંજે તેમના ભાઈ ગમનભાઈ ઘર પાસે ઉભા હતા ત્યારે ગામના જ પ્રકાશભાઈ મગનભાઈ પરમારે મોટર સાયકલ ઊભી રાખી અચાનક ગાળાગાળી કરી હતી. આ બાબતે પરિવારના સભ્યો વિનોદભાઈ, કિરણભાઈ અને રાહુલભાઈ સાથે મળીને પ્રકાશના ઘરે ઠપકો આપવા ગયા હતા.ઠપકો આપવા ગયેલા પરબતભાઇ પર આરોપી પ્રકાશે ઉશ્કેરાઈ જઈ લાકડી વડે હુમલો કર્યો હતો, જેમાં તેમને જમણા હાથે અને કપાળના ભાગે ઇજાઓ થઈ હતી. પિતાને બચાવવા વચ્ચે પડેલા પુત્ર રાહુલને પણ ગડદાપાટુનો માર મારવામાં આવ્યો હતો. અન્ય સભ્યોએ વચ્ચે પડી વધુ મારમાંથી છોડાવ્યા હતા. જતી વખતે આરોપીએ "જો ફરીથી ઘરે ઠપકો આપવા આવશો તો જાનથી મારી નાખીશ" તેવી ધમકી પણ આપી હોવાનું ફરિયાદમાં જણાવ્યું છે.
ઇજાગ્રસ્ત પરબતભાઇને તાત્કાલિક ડીસા સિવિલ હોસ્પિટલ ખાતે સારવાર અર્થે ખસેડવામાં આવ્યા હતા. સારવાર બાદ તેમણે આ મામલે પોલીસ મથકે પહોંચી કાયદેસરની કાર્યવાહી કરવા અને ન્યાય મેળવવા માટે ફરિયાદ નોંધાવી છે. પોલીસ દ્વારા આ મામલે વધુ તપાસ હાથ ધરવામાં આવી છે.
