બનાસકાંઠા એલસીબી પોલીસે રાજ્યમાં દારૂબંધીના કડક અમલ વચ્ચે મોટી કાર્યવાહી કરી છે. દાંતીવાડા નજીક નાની મહુડી ગામ પાસેથી વિદેશી દારૂ ભરેલી ફોર્ચ્યુનર કાર સાથે એક આરોપીને ઝડપી પાડવામાં આવ્યો છે. પોલીસે કુલ રૂ. 20,78,657 નો મુદ્દામાલ જપ્ત કરીને આરોપીની ધરપકડ કરી છે.
તપાસ દરમિયાન, ફોર્ચ્યુનર ગાડી (નં. GJ01RZ1805) માંથી રાજસ્થાનમાં બનેલો ભારતીય વિદેશી દારૂ અને બિયરની કુલ 2360 બોટલો મળી આવી હતી. આ દારૂની કિંમત રૂ. 5,68,657 આંકવામાં આવી છે. દારૂ ઉપરાંત, ગાડી અને મોબાઇલ સહિત કુલ રૂ. 20,78,657 નો મુદ્દામાલ કબજે લેવામાં આવ્યો છે.
પોલીસે દિનેશકુમાર મુકનારામ રાકિશન ગોદારા (રહે. રોહીલા પશ્ચિમ, તા. સેડવા, જી. બાડમેર, રાજસ્થાન) નામના આરોપીને ઝડપી લીધો છે. આરોપી દ્વારા ગાડી પર બનાવટી નંબર પ્લેટ લગાવીને દારૂની હેરાફેરી કરવામાં આવતી હોવાનું પણ સામે આવ્યું છે.પોલીસે આરોપી વિરુદ્ધ ગુનો નોંધી કાયદેસરની કાર્યવાહી હાથ ધરી છે.
