અમીરગઢ પોલીસે લૂંટ અને બાઇક ચોરી કરતી આંતરરાજ્ય ગેંગ ઝડપી 5ની ધરપકડ

ગુજરાત અને રાજસ્થાન સરહદે સક્રિય એવી આંતરરાજ્ય લૂંટ અને વાહન ચોરી કરતી એક ખૂંખાર ગેંગને ઝડપી પાડવામાં અમીરગઢ પોલીસને બહુ મોટી સફળતા હાથ લાગી છે. પ્રાપ્ત વિગતો અનુસાર, અમીરગઢ પોલીસ મથકના સ્ટાફે ચોક્કસ બાતમી અને કડક પેટ્રોલિંગ દરમિયાન આંતરરાજ્ય લૂંટ અને ચોરી કરનારી ટોળકીના ૫ સાગરીતોને રંગેહાથ દબોચી લીધા છે. પોલીસે આ આરોપીઓ પાસેથી અલગ-અલગ વિસ્તારોમાંથી ચોરેલી કુલ ૬ મોટરસાઇકલ રિકવર કરી છે. પોલીસે બાઇક સહિત કુલ રૂપિયા ૭૪,૦૦૦ નો મુદ્દામાલ જપ્ત કરીને પાંચેય શાતિર ગુનેગારોની અટકાયત કરી લીધી છે. અમીરગઢ પોલીસે આ મામલે કાયદેસરનો ગુનો નોંધીને તમામ આરોપીઓની સઘન પૂછપરછ હાથ ધરી છે. પોલીસને આશા છે કે આ આંતરરાજ્ય ગેંગની પૂછપરછમાં સરહદી વિસ્તારોમાં થયેલી અન્ય લૂંટ અને વાહન ચોરીના ભેદ પણ ઉકેલાઈ શકે છે.