બનાસકાંઠા જિલ્લામાં માર્ગ અકસ્માતોમાં ચિંતાજનક વધારો જોવા મળી રહ્યો છે. ડીસા તાલુકાના મુડેઠા ગામ પાસે સ્વીફ્ટ કાર અને બાઈક વચ્ચે ગંભીર અકસ્માત સર્જાયો હતો. આ ઘટનામાં બાઈક પર સવાર બે વ્યક્તિઓને ગંભીર ઈજાઓ પહોંચી હતી. આ અકસ્માત રતનપુરાથી ખોડલા સુધીના નેશનલ હાઈવે પર નેશનલ હાઈવે ઓથોરિટી દ્વારા અપાયેલા ડાયવર્ઝન માર્ગ પર થયો હતો. એક તરફના રોડના નવીનીકરણ કામને કારણે માર્ગ બંધ કરાયો છે, જેના કારણે ડાયવર્ઝન વાળા માર્ગ પર ટ્રાફિકનું ભારણ વધ્યું છે.
અકસ્માત બાદ બાઈક ચાલક અને પાછળ બેઠેલ મુસાફર ફંગોળાઈને નીચે પટકાયા હતા, જેથી તેમને વધુ ઈજાઓ થઈ હતી. ઘટનાને પગલે નેશનલ હાઈવે નંબર 27 પર લગભગ 30 મિનિટ સુધી એક તરફના માર્ગ પર ભારે ટ્રાફિક જામ સર્જાયો હતો. અકસ્માતની જાણ થતાં જ ભીલડી પોલીસ ટીમ અને 108 એમ્બ્યુલન્સ તાત્કાલિક ઘટનાસ્થળે પહોંચી હતી. ઈજાગ્રસ્ત બંને વ્યક્તિઓને સારવાર અર્થે હોસ્પિટલમાં ખસેડવામાં આવ્યા હતા. પોલીસે ભારે જહેમત બાદ ટ્રાફિકને ખુલ્લો કર્યો હતો. ઘટનાસ્થળે લોકોના ટોળેટોળા ઉમટી પડ્યા હતા.
