ઈકો ગાડીમાં મહિલા મુસાફર પાસેથી અજાણ્યા ગઠિયાઓએ પર્સ સરકાવ્યું
પાટણના સમી-શંખેશ્વર હાઇવે પર એક મહિલા મુસાફર સાથે ચોરીનો બનાવ બન્યો છે. ઈકો ગાડીમાં મુસાફરી કરી રહેલી મહિલાની નજર ચૂકવીને અજાણ્યા શખ્સોએ રૂ. 2.26 લાખથી વધુના સોના-ચાંદીના દાગીના ભરેલું પર્સ ચોરી લીધું હતું. આ અંગે સમી પોલીસ મથકે મહિલાએ ફરિયાદ નોંધાવી છે. પોલીસ સૂત્રો પાસેથી મળતી માહિતી મુજબ, શંખેશ્વર તાલુકાના ખીજડીયારી ગામે રહેતા ઝેબરબેન જોરાભાઈ રબારી (ઉં.વ. 32) ગત તા. 31/5/2026ના રોજ સવારે પોતાના બે સંતાનો સાથે પિયર કપરૂપુર તા. ભાભર ખાતે પૂનમ ભરવા જવા નીકળ્યા હતા.તેમની સાથે ગામના અન્ય એક મહિલા હેતલબેન સામાભાઈ રબારી પણ સમીના જેસડા બસ સ્ટેન્ડ ખાતે મળ્યા હતા. બંને સમી જવા માટે વાહનની રાહ જોઈ રહ્યા હતા.
આ દરમિયાન શંખેશ્વર તરફથી એક સફેદ રંગની ઈકો ગાડી આવતા ઝેબરબેને તેને ઊભી રખાવી હતી. ગાડીમાં ચાલક સહિત ત્રણ અજાણ્યા પુરુષો સવાર હતા. ઝેબરબેન અને હેતલબેન બાળકો સાથે વચ્ચેની સીટ પર બેઠા હતા અને દાગીના તેમજ કપડા ભરેલી ચેઈનવાળી થેલી પગ પાસે નીચે મૂકી હતી. ગાડી આગળ વધતા જ ત્રણેય શખ્સો અંદરો અંદર એવી ભાષામાં વાત કરતા હતા જે મહિલાઓને સમજાઈ ન હતી. સમી ગામ નજીક પાંજરાપોળના દરવાજા પાસે પહોંચતા જ ઈકો ગાડી અચાનક આંચકા મારીને બંધ થઈ ગઈ હતી.ચાલકે બોનેટ ખોલી ગાડી ચાલુ કરવાનો ઢોંગ કર્યો હતો અને બાદમાં જણાવ્યું હતું કે, ગાડી બગડી ગઈ છે, તમે બીજા સાધનમાં જતા રહો. સમી ગામ નજીક હોવાથી મહિલાઓ ચાલતી ચાલતી સમી બસ સ્ટેન્ડ પહોંચી હતી.
સમી બસ સ્ટેન્ડ પહોંચીને જ્યારે ઝેબરબેને કપડાની થેલીની ચેઈન ખોલીને તપાસ કરી, ત્યારે કપડાની નીચે નાની બેગમાં રાખેલું પર્સ ગાયબ હતું. પર્સમાં રહેલા દાગીના ચોરી થઈ ગયા હોવાનું માલૂમ પડયું હતું.ચોરી થયેલી મતામાં આશરે 14 ગ્રામ વજનની સોનાની ચેઈન પેન્ડલ સાથે જેની કિંમત રૂ.1,74,000, આશરે 1 ગ્રામ વજનની સોનાની વીંટી નંગ-01 જેની કિંમત રૂ. 10,900, અને આશરે 250 ગ્રામ વજનની ચાંદીની ઝાંઝરી નંગ-02 જેની કિંમત રૂ. 42,000 મળી, કુલ રૂ. 2,26,900ની ચોરી થઈ હતી. આ ઘટનાથી ગભરાયેલી મહિલાએ શરૂઆતમાં ત્રણ દિવસ સુધી આ વાત કોઈને જણાવી ન હતી. જોકે, પત્ની સતત ચિંતામાં રહેતી હોવાથી પતિએ પૂછપરછ કરતાં ઝેબરબેને સમગ્ર હકીકત જણાવી હતી. ત્યારબાદ સમી પોલીસ સ્ટેશને આવીને ફરિયાદ નોંધાવતા પોલીસે અજાણ્યા ઈસમો વિરુદ્ધ ગુનો નોંધી તપાસ હાથ ધરી હોવાનું જાણવા મળ્યું છે.
