વાવ: તીર્થગામ પાસે માડકા અને માલસણ બ્રાન્ચ કેનાલમાં પડ્યું ગાબડું!

વાવ તાલુકામાં નર્મદા નિગમની ભારે બેદરકારીના કારણે કેનાલોની જાળવણી સામે ગંભીર સવાલો ઊભા થયા છે. તીર્થગામ પાસે આવેલી માડકા બ્રાન્ચ કેનાલ છેલ્લા એક વર્ષથી તૂટેલી હાલતમાં હોવા છતાં તંત્ર દ્વારા કોઈ રિપેરિંગ કામગીરી કરવામાં આવી નથી. તો બીજી તરફ, તાજેતરમાં જ સમારકામ કરાયેલી માલસણ બ્રાન્ચ કેનાલમાં પણ મોટું ગાબડું પડતાં નબળી કામગીરીની પોલ ખુલ્લી પડી છે. શિયાળુ વાવેતરની સીઝન નજીક આવી રહી છે ત્યારે કેનાલમાં પાણી છોડવાથી ખેતરોમાં પાણી ફરી વળશે અને પાક નિષ્ફળ જશે તેવો ભય ખેડૂતોને સતાવી રહ્યો છે. સ્થાનિક ખેડૂતોએ નબળી કામગીરી કરનારા સામે કડક તપાસ કરી માડકા અને માલસણ કેનાલનું તાત્કાલિક રિપેરિંગ કરવા ઉગ્ર માંગ કરી છે.