મહેસાણા જિલ્લામાં લાંબા સમયના વિરામ બાદ મેઘરાજાએ ધમાકેદાર પુનરાગમન કર્યું છે, જેના કારણે સમગ્ર પંથકમાં ખુશીનો માહોલ છવાઈ ગયો છે. જિલ્લામાં માત્ર ચાર કલાકના ટૂંકા સમયગાળામાં ધોધમાર વરસાદ ખાબકતા અનેક વિસ્તારોમાં પાણી ભરાયાની સમસ્યા સર્જાઈ છે. ખાસ કરીને વિજાપુર તાલુકામાં મેઘરાજાએ તોફાની બેટિંગ કરી હોય તેમ માત્ર થોડા જ કલાકોમાં ત્રણ ઇંચ જેટલો સારો એવો વરસાદ વરસ્યો હતો.
વિજાપુરમાં પડેલા આ ધોધમાર વરસાદને કારણે નીચાણવાળા વિસ્તારો અને રસ્તાઓ પર પાણી ભરાઈ જવાથી જળબંબાકાર જેવી સ્થિતિ સર્જાઈ હતી, જેના લીધે વાહનચાલકો અને રાહદારીઓને ભારે હાલાકીનો સામનો કરવો પડ્યો હતો. જો કે, આ અણધાર્યા અને ભારે વરસાદથી લાંબા સમયથી પાણીની રાહ જોઈ રહેલા ખેડૂતોના ખરીફ પાકોને નવું જીવન મળ્યું છે અને ખેડૂતોમાં રાહતની લાગણી ફેલાઈ છે. તંત્ર દ્વારા પણ સ્થિતિ પર નજર રાખવામાં આવી રહી છે.
