મહેસાણા જિલ્લાના ખેરાલુ તાલુકાના લુણવા ગામે આવેલા પવિત્ર ગોગામહારાજના મંદિરમાં તસ્કરોએ ત્રાટકીને લાખો રૂપિયાની ચોરીને અંજામ આપ્યો હોવાની ઘટના સામે આવી છે. રાત્રીના સુમારે અજાણ્યા તસ્કરોએ બંધ મંદિરનું તાળું તોડીને ગર્ભગૃહમાં પ્રવેશ કર્યો હતો અને મંદિરમાં રહેલી કિંમતી વસ્તુઓને નિશાન બનાવી હતી.
પ્રાપ્ત માહિતી અનુસાર, તસ્કરો મંદિરમાંથી ચાંદી અને તાંબાના છત્તર તેમજ આસ્થાના પ્રતિક સમાન નાગ મૂર્તિઓ સહિત કુલ અંદાજે રૂપિયા 11 લાખના લાખોના મુદ્દામાલની ચોરી કરીને ફરાર થઈ ગયા હતા. સવારે મંદિરના દરવાજા ખુલ્લા અને સામાન અસ્તવ્યસ્ત જોતા આખી ઘટના પ્રકાશમાં આવી હતી, જેને લઈને સ્થાનિક ગ્રામજનો અને ભક્તોમાં ભારે રોષ અને ચિંતા ફેલાઈ ગઈ છે.
ઘટનાની જાણ થતાં જ સ્થાનિક પોલીસ કાફલો ઘટનાસ્થળે દોડી આવ્યો હતો અને સીસીટીવી ફૂટેજ તેમજ ડોગ સ્ક્વોડની મદદથી તસ્કરોને ઝડપી પાડવા માટે સઘન તપાસના ચક્રો ગતિમાન કર્યા છે. ધાર્મિક સ્થળો પર સતત વધી રહેલી ચોરીની ઘટનાઓથી લોકોમાં સુરક્ષા સામે ગંભીર સવાલો ઊભા થયા છે.
