વડનગર પંથકમાં ખુલ્લેઆમ ધમધમતા દારૂના અડ્ડાઓ પર સ્ટેટ મોનિટરિંગ સેલ (SMC) દ્વારા સપાટો બોલાવવામાં આવ્યો છે. સ્થાનિક પોલીસની ઘોર બેદરકારી અને નિષ્ફળતા સામે આવતા મહેસાણાના એસપી (SP) હિમાંશુ સોલંકીએ આકરાં પગલાં લીધા છે. જેમાં વડનગરના પીએસઆઈ (PSI)ને તાત્કાલિક અસરથી સસ્પેન્ડ કરી દેવામાં આવ્યા છે, જ્યારે અન્ય બે પોલીસકર્મીઓની પોલીસ હેડ ક્વાર્ટર ખાતે બદલી કરી દેવાતા સમગ્ર મહેસાણા પોલીસબેડામાં ખળભળાટ મચી જવા પામ્યો છે.
પ્રાપ્ત માહિતી અનુસાર, સ્થાનિક પોલીસને અંધારામાં રાખીને SMCની ટીમે સતત બે દિવસ સુધી વડનગર વિસ્તારમાં ધામા નાખ્યા હતા. આ દરમિયાન ટીમે સુલ્તાનપુરા, વલાસના અને વડનગરના અન્ય વિસ્તારોમાં ચાલતા દેશી અને વિદેશી દારૂના કાળા કારોબાર પર તવાઈ બોલાવી હતી. આ મેગા ઓપરેશનમાં ₹૩ લાખથી વધુની કિંમતનો ગેરકાયદે વિદેશી દારૂ પકડી પાડવામાં આવ્યો હતો.આ ઉપરાંત અન્ય સ્થળોએ પાડેલા દરોડામાં દેશી દારૂ, દારૂ ગાળવાનો હજારો લિટર કાચો વોશ, સડેલો ગોળ, ભઠ્ઠી ચલાવવાના સાધનો, ઇલેક્ટ્રિક મોટર્સ અને શિફ્ટ કાર તથા એક્ટિવા જેવા વાહનો મળીને કુલ *₹૭,૧૦,૦૦૦નો જંગી મુદ્દામાલ* કબજે કરવામાં આવ્યો છે.
એસએમસી દ્વારા મુખ્યત્વે 3 અલગ-અલગ સ્થળોએ સઘન રેડ હાથ ધરવામાં આવી હતી. આ ગેરકાયદેસર પ્રવૃત્તિમાં સંડોવાયેલા મુખ્ય સૂત્રધારો ભલાજી ઠાકોર, અમરતજી ઠાકોર, પ્રહલાદજી ઠાકોર અને ભરતજી ઠાકોર તેમજ વિસનગર સ્થિત શિવ શક્તિ ટ્રેડર્સના સંચાલક સહિત કુલ 22 શખ્સો વિરુદ્ધ વડનગર પોલીસ સ્ટેશનમાં ચાર અલગ અલગ ફરિયાદો દાખલ કરવામાં આવી છે. હાલમાં પોલીસે આ મામલે અમુક આરોપીઓની અટકાયત કરી લીધી છે, જ્યારે ભૂગર્ભમાં ઉતરી ગયેલા અન્ય ફરાર આરોપીઓને ઝડપી લેવા માટે તપાસનો ધમધમાટ તેજ કર્યો છે. સ્થાનિક પોલીસની નાક નીચે ચાલતા આટલા મોટા દારૂના નેટવર્કનો પર્દાફાશ થતાં ઉચ્ચ કક્ષાએથી લેવાયેલા આ પગલાં ચર્ચાનો વિષય બન્યા છે.
