સાબરકાંઠા; ધોરણ સાતમાં અભ્યાસ કરતી બાળાઓએ વિવિધ કચેરીઓમાં જઈ રાખડી બાંધી

હિંમતનગરના બેરણા રોડ પર આવેલ તપોવન વિદ્યામંદિરની 50 વિદ્યાર્થિનીએ રક્ષાબંધન પર્વ પહેલાં અનોખી પહેલ કરી હતી. આ વિદ્યાર્થિનીઓએ શહેરની વિવિધ સરકારી કચેરીઓમાં જઈને અધિકારીઓ અને રોડ પર ફરજ બજાવતા પોલીસ કર્મીઓને રાખડી બાંધી હતી. તપોવન વિદ્યામંદિરના માહિતી અનુસાર, ધોરણ 7માં અભ્યાસ કરતી આ 50 વિદ્યાર્થિની રાખડીઓ અને પેડા લઈને પોતાના શિક્ષક સાથે વાહનમાં નીકળી હતી. વિદ્યાર્થિનીઓએ હિંમતનગરની વિવિધ કચેરીઓ જેવી કે એસપી ઓફિસ, DDO, DPEO, A ડિવિઝન, B ડિવિઝન પોલીસ સ્ટેશન, ગાંભોઈ પોલીસ સ્ટેશન, DFO અને ફાયર સ્ટેશનની મુલાકાત લીધી હતી. આ ઉપરાંત, શહેરના રસ્તાઓ પર ગરમીમાં ઊભા રહીને ફરજ બજાવતા પોલીસ કર્મચારીઓને પણ તેમણે રાખડી બાંધી હતી. આ અનોખી પહેલથી પોલીસ કર્મચારીઓ અને અધિકારીઓમાં ખુશીનું મોજું ફરી વળ્યું હતું.