સાબરકાંઠા જિલ્લા ટ્રાફિક શાખાએ હેલ્મેટ ચેકિંગ ડ્રાઈવનું આયોજન કર્યું

સાબરકાંઠા જિલ્લા ટ્રાફિક શાખાએ હેલ્મેટ ચેકિંગ ડ્રાઈવનું આયોજન કર્યું હતું. આ ડ્રાઈવ દરમિયાન જિલ્લાની વિવિધ સરકારી કચેરીઓના પ્રવેશદ્વાર પર વાહનચાલકોનું ચેકિંગ કરવામાં આવ્યું હતું. ટ્રાફિક શાખાના PSI અને તેમની ટીમે હિંમતનગર, ઈડર, વડાલી, ખેડબ્રહ્મા, પ્રાંતિજ, તલોદ, વિજયનગર અને પોશીના વિસ્તારમાં આ ડ્રાઈવ હાથ ધરી હતી. ચેકિંગ દરમિયાન 115 દ્વિચક્રી વાહનચાલકો હેલ્મેટ પહેર્યા વગર મળી આવ્યા હતા. તમામ નિયમભંગ કરનારા વાહનચાલકો પાસેથી સ્થળ પર જ કુલ રૂ.29 હજારનો દંડ વસૂલવામાં આવ્યો હતો. ટ્રાફિક પોલીસના જણાવ્યા મુજબ, હેલ્મેટ ન પહેરવાને કારણે અકસ્માત સમયે વાહનચાલકોને માથામાં ગંભીર ઈજા થવાનું જોખમ રહે છે. કેટલાક કિસ્સાઓમાં મૃત્યુ પણ થાય છે. આ કારણે સરકારે દ્વિચક્રી વાહનચાલકો માટે હેલ્મેટ ફરજિયાત બનાવ્યું છે. જો કે, સાબરકાંઠા જિલ્લામાં ઘણા વાહનચાલકો હજુ પણ આ નિયમનું પાલન કરતા નથી. આવા વાહનચાલકોને કાયદાનું પાલન કરાવવા માટે આ વિશેષ ડ્રાઈવનું આયોજન કરવામાં આવ્યું હતું.