રમુણ સબ સ્ટેશનમાંથી ચોરાયેલા બે રીએક્ટર, કાર સહિત રૂ.3.15 લાખનો મુદ્દામાલ કબજે: પાંચથી વધુ ચોરીના ગુનાઓનો ભેદ ઉકેલાયો
બનાસકાંઠા જિલ્લામાં GEBના સબ સ્ટેશનોને નિશાન બનાવી વીજ ટ્રાન્સફોર્મરના રીએક્ટર, કોપર-એલ્યુમિનિયમ વાયર સહિતના વીજ ઉપકરણોની ચોરી કરતી સૌરાષ્ટ્રની આંતર જિલ્લા ગેંગનો બનાસકાંઠા લોકલ ક્રાઈમ બ્રાન્ચે પર્દાફાશ કર્યો છે. LCBએ ગેંગના મુખ્ય સૂત્રધાર સહિત બે આરોપીઓ ને ડીસા નજીક ભોયણ ગામ પાસેથી ઝડપી પાડી તેમની પાસેથી ચોરીના બે રીએક્ટર, મોબાઈલ અને ગુનામાં વપરાયેલી ટાટા ઇન્ડિગો કાર મળી કુલ રૂ.3.15 લાખનો મુદ્દામાલ કબજે કર્યો છે. આ સાથે GEBના બે અને અન્ય ત્રણ મળી પાંચથી વધુ ચોરીના ગુનાઓનો ભેદ ઉકેલાયો છે.
ડીસા તાલુકાના રમુણ ગામે આવેલા 66 કે.વી. GEB સબ સ્ટેશનમાં તા.27 ઓક્ટોબરની રાત્રિથી 28 ઓક્ટોબરની વહેલી સવાર દરમિયાન તસ્કરોએ ફેન્સિંગ વાયર કાપી અંદર પ્રવેશ કરી રૂ.1.40 લાખની કિંમતના ત્રણ રીએક્ટરની ચોરી કરી હતી. આ જ સબ સ્ટેશનમાં અગાઉ તા.10 જુલાઈના રોજ પણ ફેન્સિંગ વાયર કાપી રૂ.45 હજારનો રીએક્ટર ચોરાયો હતો. એક જ સ્થળે વારંવાર થયેલી ચોરીના બંને બનાવોમાં ડીસા રૂરલ પોલીસ મથકે ગુના નોંધાયા હતા.
બનાસકાંઠા રેન્જ IG પરીક્ષિતા રાઠોડ અને જિલ્લા પોલીસ અધિક્ષક પ્રશાંત સુંબેની સૂચનાથી LCB PI ડી.એમ.રાઠોડના સુપરવિઝન હેઠળ PSI આર.બી.જાડેજા અને જે.એસ.ગઢવીની ટીમોએ તપાસ હાથ ધરી હતી. પોલીસ દ્વારા હ્યુમન સોર્સ અને ટેકનિકલ સર્વેલન્સના આધારે રમુણથી રાધનપુર તથા થરાદ સુધીના આશરે 200 CCTV કેમેરાના ફૂટેજ તપાસવામાં આવ્યા હતા. જેમાં ચોરીમાં સફેદ રંગની કારનો ઉપયોગ થયો હોવાનું અને કાર સૌરાષ્ટ્ર તરફથી આવી હોવાનું સામે આવ્યું હતું.
આધુનિક ટેકનિકલ તપાસ અને બાતમીના આધારે પોલીસે રાજકોટના કૌશિકભાઈ સોમાભાઈ સાગઠીયા તથા મોરબીના આકાશ સુરેશભાઈ વિકાણીને ડીસા નજીક ભોયણ ગામ પાસેથી ઝડપી પાડ્યા હતા. તેમની પાસેથી ચોરીના બે રીએક્ટર રૂ.1.40 લાખ, બે મોબાઈલ રૂ.30 હજાર અને ટાટા ઇન્ડિગો કાર રૂ.1.50 લાખ મળી કુલ રૂ.3.15 લાખનો મુદ્દામાલ કબજે કરવામાં આવ્યો હતો.
