ડીસાના ઇસ્કોન કોમ્પલેક્ષ સ્થિત ઇમેજિંગ સેન્ટરમાં બેટરી ફાટતા ભીષણ આગ ભભૂકી

બનાસકાંઠા જિલ્લાના ડીસા શહેરમાં આવેલ ઇસ્કોન કોમ્પલેક્ષમાં અચાનક આગ લાગવાની મોટી ઘટના સામે આવી છે. મળતી માહિતી મુજબ, કોમ્પલેક્ષમાં આવેલા એક ઇમેજિંગ સેન્ટરમાં બેટરી ફાટવાના કારણે આગ ભભૂકી ઉઠી હતી. ​આગ એટલી ભીષણ હતી કે, ઇમેજિંગ સેન્ટરમાં રહેલા અત્યંત મોંઘા અને મહત્વપૂર્ણ એવા એમ.આર.આઈ. મશીન, સી.ટી. સ્કેન મશીન અને સોનોગ્રાફી સહિતના સાધનો આગની ચપેટમાં આવીને બળી ગયા હોવાની પ્રબળ આશંકા સેવાઈ રહી છે.​ ઘટનાસ્થળની આજુબાજુ અન્ય હોસ્પિટલો પણ આવેલી હોવાના કારણે આગ લાગતા જ દર્દીઓ અને સ્ટાફમાં ભારે નાસભાગ અને દોડધામ મચી ગઈ હતી. 

સદનસીબે સમયસર સ્થિતિને ધ્યાને લઈ ફાયર વિભાગની ટીમ તાત્કાલિક ઘટના સ્થળે પહોંચી ગઈ હતી. અને આગ પર કાબૂ મેળવવાની કામગીરી યુદ્ધના ધોરણે શરૂ કરી દીધી છે. આગના કારણે સેન્ટરમાં કેટલું નુકસાન થયું છે. અને કઈ-કઈ વસ્તુઓ બળીને ખાખ થઈ છે તેની ચોક્કસ માહિતી આગ સંપૂર્ણપણે બુઝાયા બાદ જ બહાર આવશે.