ડીસા તાલુકાના ધરપડા (ફતેપુરા) ગામના યુવકનું બાઈક અકસ્માતમાં ગંભીર રીતે ઈજાગ્રસ્ત થયા બાદ સારવાર દરમિયાન મોત નીપજતાં અરેરાટી વ્યાપી ગઈ છે. બનાવ અંગે પોલીસ મથકે ફરિયાદ નોંધાઈ છે.
મળતી વિગતો અનુસાર, ધરપડા ગામના પાંચાજી કાનાજી ઠાકોર (સોલંકી) અને તેમના ગામના વિશાલભાઈ જોમાભાઈ પ્રજાપતિ ગત તા. ૨૬/૦૯/૨૦૨૬ના રોજ રાત્રે બાઈક (જીજે-24-એઆર-7536) લઈને પાટણ તાલુકાના દુધાવડા-રામપુરા ખાતે મેલડી માતાજીના મંદિરે દર્શનાર્થે ગયા હતાત્યાંથી પરત ફરતી વેળાએ મોડી રાત્રિના આશરે બે વાગ્યાની આસપાસ આસેડા ગામ નજીક ગોળાઈમાં અચાનક રોડ પર આખલો આવી ગયો હતો. જેથી બાઈક આખલા સાથે અથડાતાં નીચે પટકાઈ ગયું હતું. આ અકસ્માતમાં બાઈક ચલાવી રહેલા પાંચાજી ઠાકોરને માથા તેમજ કપાળના ભાગે ગંભીર ઈજાઓ પહોંચી હતી, જ્યારે પાછળ બેસેલા વિશાલભાઈનો આબાદ બચાવ થયો હતો.
ઘટના બાદ ૧૦૮ એમ્બ્યુલન્સ મારફતે ઈજાગ્રસ્તને તાત્કાલિક ડીસા સિવિલ હોસ્પિટલ ખાતે ખસેડવામાં આવ્યા હતા. ત્યાંથી વધુ સારવાર અર્થે પાલનપુર અને ત્યારબાદ પાટણની ખાનગી હોસ્પિટલમાં દાખલ કરવામાં આવ્યા હતા. જ્યાં લાંબી સારવાર દરમિયાન તા. ૧૨/૧૦/૨૦૨૬ના રોજ પાંચાજી ઠાકોરનું કરુણ મોત નીપજ્યું હતું.બનાવ સંદર્ભે વિશાલભાઈ પ્રજાપતિએ પોલીસ મથકે ફરિયાદ નોંધાવતા પોલીસે ધોરણસરની કાયદેસર કાર્યવાહી હાથ ધરી છે.
