મહેસાણા જિલ્લાના કડી તાલુકામાં આવેલા ઈરાણા ગામની સીમમાંથી નંદાસણ પોલીસે લાખો રૂપિયાનો વિદેશી દારૂ પકડી પાડ્યો છે. મળેલી ચોક્કસ બાતમીના આધારે પોલીસે એક બંધ ગોડાઉન પર દરોડો પાડીને રૂપિયા ૬૫.૬૦ લાખનો વિદેશી દારૂ અને એક પીકઅપ વાહન મળીને કુલ ૬૮.૬૦ લાખ રૂપિયાનો મુદ્દામાલ જપ્ત કર્યો છે. આ ગેરકાયદેસર પ્રવૃત્તિ મામલે પોલીસે ગોડાઉનનો કબજો ધરાવનાર અને વાહન માલિક વિરુદ્ધ કાયદેસરની કાર્યવાહી શરૂ કરી છે.
નંદાસણ પોલીસ સ્ટેશનના પીઆઈ એન.જી. ગોહિલ અને પીએસઆઈ જે.એમ. ગેહલાવત તેમની ટીમ સાથે પેટ્રોલિંગ કરી રહ્યા હતા, ત્યારે તેમને આ ગુપ્ત માહિતી મળી હતી. બાતમીમાં જણાવવામાં આવ્યું હતું કે, ચડાસણા પાટિયાથી કમલા અમૃત જીઆઈડીસી તરફ જતા માર્ગ પર એગ્રીમ પ્રિન્ટ એન્ડ પેક કંપનીની સામે આવેલા લોખંડના પતરાવાળા બે નંબરના બંધ ગોડાઉનમાં દારૂનો જંગી જથ્થો સંતાડવામાં આવ્યો છે. આ ચોક્કસ માહિતીના આધારે પોલીસ કાફલાએ તુરંત જ ઘટનાસ્થળે પહોંચી ગોડાઉનનું તાળું તોડીને સઘન તપાસ હાથ ધરી હતી.
પોલીસની તપાસ દરમિયાન ગોડાઉનની અંદરથી અને ત્યાં પાર્ક કરેલા એક પીકઅપ ડાલા (GJ-08-AW-3135) માંથી કુલ ૪૩૨ પેટીઓ મળી આવી હતી, જેમાં વિદેશી દારૂની ૭૨૦૦ જેટલી બોટલો હતી. રેડ સમયે સ્થળ પર કોઈ વ્યક્તિ હાજર ન હોવાથી, પોલીસે નંદાસણ પોલીસ મથકમાં પ્રોહિબિશન એક્ટ મુજબ ગુનો દાખલ કર્યો છે. હાલમાં, નવા સર્વે નંબર ૮૫૦ના સબ પ્લોટ નંબર ૩ પર સ્થિત આ ગોડાઉનના સંચાલક અને ડાલાના માલિકને પકડવા માટે પોલીસે વધુ તપાસના ચક્રો ગતિમાન કર્યા છે.
